Gemarineerde Lende skyf slaai (Sirloin)

Kortpad idees en beter beplanning nodig vir jou etes wat gesond en voedsaam is? Hier is vir jou sommer ‘n paar heerlike idees vir Sondag aande voorbereidings!

Groente voorbereiding
Dit is vir my altyd gerieflik om na werk, soms na 19h00, net vinnig ‘n paar voorbereide groente en vrugte uit die yskas te haal en saam te slaan vir ‘n heerlike slaai opsie of as ‘n volledige ete. Nou hoe gaan mens te werk om slaai vir ten minste 7 dae lank vars te hou? Ek gaan vir die doel van hierdie resep net die bestanddele wat gebruik word bespreek. Ek gee ook paar ander skakels na resepte soos om Spruite te maak en mikro groente bommetjies.

Jong baba spinasie blare: hierdie blaartjies kan baie maklik smetterig raak en moet goed in asyn water afgespoel word. Neem so 5 e asyn in jou spoel water en week eers die blare daarin….dan dreineer en druk baie liggies droog met handdoek papier of slaai spinner. Plaas dan in ‘n sakkie met ‘n stukkie van die handdoek papier sodoende dit vars te hou vir dae lank of in ‘n bakkie met digpassende deksel.

Spruite: nadat jy jou spruite gekweek het of aangekoop het spoeld dit net in gewone kraan water en laat in ‘n siffie droog word. Plaas in ‘n glasbottel en ‘n stukkie handdoek papier bo op. MOENIE toemaak met ‘n deksel nie, die spruite en mikrogreens moet asem haal. Die spruite sal vir 14 dae goed hou en ook nie smetterig raak.

Sitrus wiggies: lemoen wiggies kan vooraf geskil word en in ‘n bakkie met digpassende deksel gestoor word ook met ‘n stukkie handdoek papier in.

Vleis marinade: hierdie marinade is geskik om enige rooivleis asook vark te marineer.
1 k egte olyfolie
1/4 k gewone joghurt of karringmelk
1 t fyn knoffel
1 t gerookte paprika
2 e soja sous of woestersous
6 stukkies 4 cm dikte sirloin skywe

Plaas vleis in die marinade en stoor dit vir 1 tot 7 dae in die marinade. Maak gaar op aanvraag. In my kookboek Vleis die omvattende gids skryf ek oor gaarmaak metodes in diepte en ook gaarmaak tye vir vleis. Loer gerus op die rooi gemerkte skakels. 

Sodra die vleis gaar gemaak is in ‘n warm voorverhitte pan, los vir 5 min, sout en peper en sny dan voor. Los vir ‘n wyle en pak gou die slaai. Al wat kort is feta en neute van keuse. Pak dan ‘n bakkie met die slaai bestanddele en pak dan ‘n heerlike hopie vleis daarop.

Geniet!

Bron: www.annelienpienaar.co.za deur Annelien Pienaar 2024

Hoeveelheid: 4 porsies