Warm Mosterd Aartappelslaai
Lewer 6 porsies
’n Dekadente slaai gepak met geur en die sousie van hierdie slaai is baie uniek in die sin dat dit ook oor geroosterde groente, aartappel in sy jassie en vele meer geregte bedien kan word. Koud of warm is hierdie slaai keer op keer ’n groot treffer!
1 kg baba aartappels, gekook in sterk sout water, halveer
olyfolie
sout en peper
15 g botter
1 sjalot, fyn gekap
2 knoffelhuisies, fyn
250 ml hoender- of groenteaftreksel
22 ml Dijon mosterd
15 ml growwe mosterd
175 ml room
250 ml suurroom
1½ t mielieblom
2 t water
5 ml suurlemoensap
30 ml vars dille, gekap
½ k swart olywe, ontpit en fyn gekap
1 k aghurkies, fyn gekap
Voorverhit die oond tot 200°C.
Plaas die halveerde gaar aartappels op ’n bakplaat, bedruip met olyfolie en geur met sout en peper. Meng goed en versprei eweredig. Moenie dig op mekaar pak.
Rooster vir 35–40 minute totdat dit goudbruin en sag is.
Verhit intussen die botter en ’n bietjie olyfolie in ’n pan oor medium hitte. Voeg die sjalot by en soteer tot sag. Voeg die knoffel by en soteer vir nog ’n minuut.
Voeg die aftreksel by en bring tot kookpunt. Klits die mosterd, sout en peper in en laat effens reduseer: basies kook die vog met amper die helfte weg.
Voeg die room by en bring weer tot prut. Meng die mielieblom en water tot ’n pasta en klits dit by die sous. Laat kook totdat dit verdik.
Voeg die suurlemoensap by en proe vir geur, roer die suurroom by en meng tot glad.
Skep die lagies van die aartappels, olywe en aghurkies in ’n opdienbak, skep van die sous oor en sprinkel dille oor. Herhaal in lae en bedien warm.
Variasie: biltong stukkies, spek en gerookte ham stukkies is heerlik hier by en jy kan na smaak byvoeg.
Bron: www.annelienpienaar.co.za deur Annelien Pienaar 2026
