Hoender en roommielie sop

As jong getroudes het die pennies soms maar geknyp veral as een van die getroudes nog studeer. Hierdie resep is uit nood gebore met die aand wat ons vir die Alkia jeug Bybelstudie aan huis sop en broodjies moet voorsit. Eintlik het ek vergeet van die ete en die middag terug van klas staan ek voor die yskas met groot oë en besef ek moet nou toor! Daar is ’n halwe hoender, driekwart blikkie room mielies, ’n sak koekmeel en gis. Die kruie en speserye is nog genoeg en ek spring in. Roer, proe, bak brood en wat wou…die kos het 15 gewillige eters laat koer oor die kos, min het hul geweet dat daar nood was! Soms mis mens daardie tye van jonk wees en nog aan die stoei.

150 g (1 k) gaar hoendervleis, in fyn repies
1 blikkie, 410g, roommielies of geroomde sampioene of aspersies of geroomde spinasie
1 liter (4 k) hoender aftreksel
30 ml (2 e) sojasous
30 ml (2 e) mielieblom aangemaak met 50 ml water
1 t suurlemoenskil, gerasper
4 e spriet uie, fyngekap
1 e tiemie gedroog
¼ t borrie
¼ t vars fyn knoffel
sout en peper na smaak

Verhit al die bestanddele saam behalwe die spriet uie en tiemie, kook vir 10 minute saam. Voeg die tiemie by en kook vir 3 minute. Garneer met rissie vlokkies en spriet ui lowwe.

Bedien warm met heerlike skywe vars brood.

Bron: Annelien Pienaar, 1995
Hoeveelheid: 4 porsies