Die Afrikaans vir jaffel is Knypkoek, maar vir my bly dit ‘n boepens jaffel broodjie en klaar. Maar hiermee saam is daar oneindige variasies van hierdie heerlike resep.
Hierdie is nou nie eintlik ’n resep nie, maar eerder ’n bespreking en antwoord van bak probleme t.o.v. jafels en ander toeknyp rooster broodjies. Sit die brood vas aan die pannetjie? Breek en val al die vulsels uit? Hier is my idees rondom die gebruik van hierdie toeknyp pannetjies en hul werking. Dit maak nie saak of dit elektries of nie-elektries aangedryf word…almal werk op dieselfde beginsel.
1. Broodjies moet met regte egte botter gesmeer word. Margarien en sproei kleefwerende middels brand vas en gee ook nie daardie kenmerkende brosheid soos botter.
2. Pannetjies wat oor gasvlamme of elektriese plate gebruik word moet ten minste 3 minute aan beide kante verhit word op ongeveer die helfte van die gas of hitte verstelling wat daar is. Bv. As die gas stelling 1-6 is werk op drie.
Heerlike vulsel idees:
1. Kerrie Maalvleis resep op die webtuiste
2. Soet franseroosterbrood met Melktert vulsel: Maak die Soet mosbeskuit resep sê en bak dit soos ‘n gewone brood. Sny die brood in skywe en doop in geklitste eier. Plaas op pannetjie waarin botter gesmelt is. Skep lepels vol melktert pap in en maak weer toe met broodjie. Bak vir ongeveer 3 minute aan beide kante. Sprinkel met kaneel en versiersuiker mengsel met ’n sterkte wat jou pas.
3. Vir die volgende resepte kan jy gebruik op my webtuiste die Melktert resep: Melktert vulsel Soetmosbeskuit resep is in my Boerekos met ‘n Twist kookboek
Bron: Annelien Pienaar, Kookklas 2015, epos: boerekostwist@gmail.com
4 Replies to “Jaffels”
Connie van der Merwe
Hallo Annelien ek wil net graag met jou deel ek sukkel al baie jare met my Jaffels en is lief om dit te maak na ek jou bespreking gelees het gaan koop ek toe regte botter soos jy sê en my man word gestuur om brood te koop en hy dink hy doen my ‘n guns om die varsste brood wat hy kan kry te koop nouja ek weet vars brood is maar geneig om vas te sit maar het dit toe bietjie gesukkel om met die botter te smeer en my reggemaak vir die sukkel en voorwaar nie EEN het vasgesit nie van nou af net regte botter vir Jaffels vir my baie dankie vir die goeie raad!
Annelien
Connie, baie dankie vir die positiewe terugvoering…dit laat my dink aan ‘n staaltjie van my man. Hy het vreeslik eendag met my geraas toe ek dit waag om vars brood te rooster. Ons was seker so 3 maande getroud. Hom so staan en kyk my tong geklap. Die volgende sny brood ingesit…hy pluk dit uit en neem ‘n stuk ou brood en druk dit in die rooster. Sy woorde: “My ma het altyd die ou brood vir ons gerooster, nooit vars brood!”. Wel, my skoonma daaroor aangespreek en gevra waar sy aan die ding kom. Sy het so groot geword want dit was al manier hoe haar ma die ou brood vars kon laat proe. Net om pennies om te draai. Hoe kosbaar is dit nie? Beste wense en jy is ‘n oulike Twister!
Hester Naude
Die kêrriemaalvleis…….. hoe kom ekby die webtuiste uit, asb.!
Annelien
Hallo Hester, as jy op die woorde wat rooi gemerk is… Kerrie maalvleis klik sal jy na die resep geneem word. Laat weet as jy nog sukkel.