Hierdie is die perfekte speel klei vir klein handjies waarvan die spiertjies in die vingertjies geoefen word. Verder word die fyn sensore ontwikkel deur speelgoed soos albasters daarin weg te steek en speel-speel moet hul met hul minder dominante handjie die albasters uitvroetel. So het moeder vir ure met ons as kinders en ook later haar klein kinders speel, speel ons slim gemaak!
Die kremetart preserveer die klei vir ongeveer 6 maande as dit lugdig gehou word.
Kookolie of selfs olyfolie keer dat die sout nie kleingoed se handjies en velletjies uitdroog nie.
Ek rol die deeg uit en stempel in die deeg teksture en druk dan vormpies uit, ek maak gaatjies met ‘n strootjie vir ‘n plekkie om ‘n toutjie deur te sit. Dit word dan saam met my geskenk pakkies as versiering gesit. Wie het gesê klei is nie vir grootmense nie?
280 g (2 k) koekmeel – ek verkies Snowflake, gee fyner tekstuur
500 ml (2 k) water
140 g(½ k) tafelsout
15 ml kremetart
15 ml kookolie
4 ml voedsel kleuresel
2 ml aromaterapie olie – opsioneel vir geskenk pakkies (nie eetbaar vir kindertjies nie)
Meng al die droë bestanddele saam. In ‘n swaarboom kastrol verhit water en olie tot kookpunt en voeg die meelmengsel by. Roer vinnig en aanhoudend totdat die deeg ‘n bol vorm en los kom van die kante. Dit gaan lyk soos wanneer jy poffertjie deeg maak.
Laat die deeg effens afkoel en knie dan vir 5 minute tot glad en sag. Indien jy aromatiese olies wil byvoeg, is dit nou die tyd asook kleursel, knie weer goed deur.
Stoor in lugdigte houers vir 3 maande.
Lewer: 750 g klei.
Bron: Annelien Pienaar, verwerking van moeder se resep, 1979
