Ek het grootgeword met elke dag ’n bakkie mieliepap vir ontbyt…grof en steen gemaal op die plaas. Ons het nie die meel gesif nie en glo vir my die mieliepap was heerlik romerig. Vandag kan ek met opgewondenheid sê dat daar weer ‘n herlewing is in hierdie verband. Heerlike romerige mieliemeel. By ons in Noordwes is daar Winners meel wat in Swartruggens gemaal word en aan hierdie vereistes voldoen. Dan die groot ontdekking vir my persoonlik verlede jaar was Lowerland in Prieska se goudgeel GMO vrye mieliemeel…grof, romerig en ongesif. Vol goedheid en gesond. Kom ons maak pap!
2 liter water
5-6 koppies grof gemaalde mieliemeel plus dreineer water van soetmielies
1 blikkie soetmielie pitte, dreineer
1 e sout
4 e botter, egte botter
Kook die water met sout in ’n kastrol met dig passende deksel. Ek vind dat ’n gietyster kastrolletjie die beste opsie is en die aanbrand minder. Voeg die mieliemeel stadig by terwyl jy klits om klonte te voorkom. Hou so aan klop totdat die mengsel begin verdik. Draai die hitte af na stadig en prut vir 1 uur.
Roer na ‘n uur deeglik deur en voeg die botter en mieliepitte by en roer goed deur, kook nog ‘n halfuur.
Smaaklike ete.
Bron: Annelien Pienaar, 2017
Hoeveelheid: 6 porsies
