Roerbraai groente gereg

Vars groente is deesdae volop in supermarket in reeds verwerkte vorm beskikbaar. Ek is baie lief vir baba spinasie blare, wortel repies, uie, tuin ertjies…alles met ‘n heerlike kraak in elke happie. Daarmee saam is dit belangrik om ‘n heerlike sousie oor die gebraaide groente te bedien…en dit is hier waar ek baie lief is om geroosterde speserye soos fennel of cumin te gebruik . Hierdie resep is geskik vir ‘n gesin van 6 persone.

2 medium uie, geskil en in wiggies gesny
250 g sampioene, afgevee en gesnipper
250 g wortel repies, julienne
250 g rooi soetrissie
250 g snap peas, mangetout
500 g kool, fyn repies gesny, chiffonade
1 pakkie (100g) baba spinasie blare
4 e olyfolie
6 rooi basilie kruid blare vir garnering…nie vir braai doeleindes

Sous
¼ k olyfolie
¼ k balsamiese asyn reduksie (neem 1 k balsamiese asyn en kook tot dat dit met 3 dele verdamp het)
¼ k witwyn van goeie kwaliteit
½ t knoffel vars, fyn gedruk
1 e heuning
1e – 2e groente sout p. 211 BKT kookboek

Roerbraai die groente in volgorde soos in die bestanddele lys beskryf. Onthou asb om nooit sampioene te was, maar net af te vee anders gaan daar baie vog wees. Sampioene is sponsagtig en sal water absorbeer…

Voor verhit pan oor matige hitte en braai die uie tot glansend in die 4 e olyfolie. Braai dan die sampioene tot gekrimp en vog verdamp het. Voeg dan die res van die bestanddele soos in die lys beskryf by…moenie te veel braai nie…5 min is meer as genoeg om die brosheid van die groente te behou.

Terwyl die groente braai voeg dan die sous bestanddele saam en hou eenkant. Soms maak ek vooraf die sous in veelvoud en gebruik soos nodig. Die sous hou ongeveer 2 maande in die yskas.

Sodra die groente Al dente is…bros en ferm as dit gebyt word…voeg die sous by en roer vinnig deur. Bedien dadelik.

Bron: Annelien Pienaar, 2018