Pannekoek

Elkeen van ons het ons eie idee van die perfekte pannekoek. Wel, hier is my idees rondom die onderwerp en paar wenke wat ek met die jare heen opgetel het.

1. Hierdie pannekoek beslag se eindproduk is lig en donsig, a.g.v. die asyn wat bygevoeg word. Die bakpoeier word aan die einde van die 30 minute rustyd van die beslag bygevoeg, onthou die asyn sal dit onmiddellik laat reageer, dus bak die beslag sodra jy die bakpoeier bygesit het, anders na 1 uur verloor dit sy werking.

2. Olie in die beslag help om te keer dat die pannekoeke vas klou aan die pan.

3. Bereiding van die pan voordat jy bak. Ek het nou ‘n ou Hart pan, cheapie, ek weet, maar jinne sy kan bak, soms raak sy halstarrig dan moet ek haar skuur sodat die pannekoeke nie vas sit nie. Jy verwarm die pan en drup bietjie olie in, sprinkel met sout (½ t) en vat dan kombuispapier en vryf goed oor die oppervlakte sodat die kolle wat aanbrand geskrop is. Vee goed af en bak jou pannekoek. As jy ‘n kleefvrye pan het dan is dit nie nodig nie.

4. ‘n Pannekoek moet vinnig bak in ‘n pan wat vooraf verhit is.

5. Ek gebruik ‘n gewone ballon klitser (whisk) om die beslag aan te maak, los maar die elektriese goed.

6. Die resep vermeerder met gemak sonder enige aanpassings.

7. Die beslag kan sonder bakpoeier in yskas vir 2 weke gehou word.

8. Gaar Pannekoek kan gevries word in lae van 10 en by kamertemperatuur ontdooi word.

280 g (2 k) koekmeel
2.5 ml (½ t) sout
125 ml (½ k) olie
30 ml (2 e) wit druiwe asyn
2 groot eiers
750 ml – 1 liter (3-4 k) water
10 ml (2 t) bakpoeier

Sif koekmeel en sout saam.

Meng al die vloeistowwe saam en klits met water. Voeg by koekmeel en gebruik ‘n ballon klitser om te klits.

Voeg die res van die water by, die dikte moet soos room wees.

Laat staan vir 30 minute. Toets die dikte, moet soos room wees en voeg die bakpoeier by.

Bak in warm pan. Sodra die beslag van die kante los trek kan jy die deeg om draai.

Bron: Annelien Pienaar
Hoeveelheid: 20-25 van 24cm deursnit

Variasie:

Sjokolade pannekoek
4 e kakao in die koekmeel in gesif.
50 ml ekstra water by die beslag.

Spinasie pannekoek
3 e spinasie poeier (droog spinasie en maak ‘n poeier met die wet ‘n dry mill van die Bamix)
50 ml ekstra water by die beslag.

Heerlik met ‘n salm en roomkaas vulsel of ouma Hantie se knoffelroom sous in die BKT kookboek

Beet pannekoek
3 e Beet poeier soos vir Spinasie
50 ml ekstra water

Brandewyn kaneel suiker
1 k witsuiker
1 e kaneel, fyn
knippie neutmuskaat
10 e fyn gerasperde sjokolade van keuse
2 e brandewyn

Meng alles saam en gebruik soos normale kaneel suiker

Bron: www.annelienpienaar.co.za vir Pretoria FM en Maroela Media deur Annelien Pienaar Food Consultant. Sluit gerus ook by die Boerekos met ‘n Twist kookgroep op Faceboek aan vir aktuele en interaktiewe kos klasse en lesse.

Hoeveelheid: 20 pannekoeke