Melk ysies met ‘n Twist

My liewe moeder het vir ons as kinders hierdie heerlike ysies gemaak en ons het elkeen op die ouderdom van 8 jaar self begin melk ysies te maak. Hier is my idees rondom die basiese resep. Indien jy met verskillende sjokolades speel sal ʼn wit basis baie variasie gee om met vrugte geure ook te speel asook kleure. Dus, speel is die beste manier om te leer wat kan ons en wat kan ons nie. Vrugte pulpe kan gebruik word maar moet eers vooraf gekook word met ʼn bietjie suiker sodat die vries van die roomys suksesvol en aangenaam op die tong sal wees.

Vir pulp
1 k vrugte pulp
½ k suiker
Meng suiker en pulp saam en kook in die mikrogolf oond vir 5 minute. Koel af en hou eenkant. Hierdie pulp kan dan in 50-100 g porsies in die basis wit mengsel gebruik word na smaak.

Basiese melk ysie
250 ml melk
150 ml room
2 e witsuiker
100 g sjokolade splinters (bakkers soort nie eet soort)wit, sjokolade of donker sjokolade is geskik.

Mikrogolf metode:
Plaas melk, room en witsuiker in ʼn vuurvaste bak en verhit vir 2 minute. Sodra die mengsel begin kook stop en haal die bak uit. Meng die sjokolade by en hou aan roer al lyk dit of die mengsel skif. Sodra die mengsel egalig is en die sjokolade gesmelt het, laat koel af vir 5 minute.

Berei die roomys vormpies voor deur seker te maak dit is skoon en uit gespoel en droog.

Giet die mengsel en vries vir 6 ure of langer.

Stoof plaat
Plaas melk, room en witsuiker in ʼn 2 liter kastrol en bring tot kookpunt. Verwyder van hitte en meng die sjokolade by en hou aan roer al lyk dit of die mengsel skif. Sodra die mengsel egalig is en die sjokolade gesmelt het, laat koel af vir 5 minute.

Berei die roomys vormpies voor deur seker te maak dit is skoon en uit gespoel en droog.

Giet die mengsel en vries vir 6 ure of langer.

Bron: www.annelienpienaar.co.za deur Annelien Pienaar 2020
Hoeveelheid: 6 roomys lollies