Biltong kaaskoek met Soetrissie sous

Pansmeer neem die plek in van kleefwerende kossproei. Vind die resep in die Boerekos met ‘n Twist kookboek

Biltong kaaskoek:
p165 Boerekos met ‘n Twist kookboek
Lewer 8 porsies

Hierdie kaaskoek is ongelooflik heerlik en luuks – ’n kruising tussen ’n quiche en ’n kaaskoek. Dit maak ook die wonderlikste individuele tertjies van kolwyntjiegrootte. Die bokmelkkaas kan met enige ander soort sagte kaas soos brie, camembert of bloukaas vervang word.

Kors
140 g koekmeel
215 g botter of bakkersmargarien
100 g cheddar gerasper

Vulsel
350 g roomkaas (nie maaskaas nie)
250 ml (1 k) room
5 groot eiers
40 g bokmelkkaas
5 ml (1 t) gerookte paprika
sout en peper na smaak
10 ml (2 t) dilleblaarpuntjies
5 ml (1 t) fyngekapte knoffel
500 ml (2 k) fyn gekerfde biltong

Druk die tertkorsmengsel in ’n gesmeerde tertbak van ongeveer 24 cm in deursnee met kante van ongeveer 5-7 cm hoogte. Voorverhit die oond tot 180 ⁰C.

Voeg al die bestanddele saam en klits vir 2 minute.

Skep die vulsel in die tertdop. Bak groot terte vir 45–60 minute en klein tertjies van kolwyntjiegrootte vir ongeveer 25–35 minute by 180 ℃. Sit koud of warm voor met ’n slaai.

Soetrissie sous
Boerekos met ‘n Twist kookboek p.200

Lewer 1,5 kg

Hierdie sousie is pikant, tog is die geure sag en die soet en suur goed gebalanseer – een van daardie vinnige souse om te maak en vir almal uit te deel. Ek gebruik die sous ook graag as marinade vir varkvleis, saam met kaasborde en natuurlik as sous by Kerriegeregte.

800 g (4 k) witsuiker
500 ml (2 k) wit druiweasyn
80 ml (5½ e) mielieblom of (3 e pektien poeier of p.195, Boerekos met ‘n Twist kookboek, een kooksel, Tuisgemaakte appel pektien)
625 ml (2½ k) water
2 rooi brandrissies, ontpit, gekap
8 mediumgroot wit uie, gekap
8 soetrissies, gekap
60 ml (4 e) knoffelvlokkies
15 ml (1 e) sout
15 ml (1 e) Atjarmasala (p.206, Boerekos met ‘n Twist kookboek)

Meng die suiker en pektien poeier saam indien jy met pektien gaan werk. As jy nie pektien kry nie sal jy mielieblom met so bietjie water moet aanmaak en eenkant hou.

Braai die uie met bietjie olyfolie vir 5 minute to glansend en deursigtig. Voeg die soetrissies by en braai vir ‘n minuut. Voeg die masala by en braai vir 1 minuut.

Voeg die res van die bestanddele by en kook tot dik vir ongeveer 30 minute. Skep bietjie van die mengsel uit op ‘n koue piering en kyk dat die mengsel redelik set.

Voeg die knoffel by en kook 1 minuut en bottel dadelik in warm gestereliseerde flesse. Sien op p. 195-196 Boerekos met ‘n Twist kookboek hoe om te steriliseer.