Roly Poly

As ek die woorde Roly Poly hoor, dan weet ek dit is winter tyd! Ek het groot geword met hierdie lekker nagereg en my ma het dit altyd as deel van ‘n stowe vleis spyskaart bedien. Dan was daar ‘n groot beker met vla en my sussie het altyd die velletjie gekry. Ek het weer gegril vir die stukkies in die vla en het dus met groot liefde as ousus die sussies die velletjie laat kry!

Een geheim van die nagereg is dat jy versigtig moet wees om nie die deeg te oorwerk nie. Verder is dit maklik. Ek gebruik enige soort konfyt soos wat die gier my pak. Dus tradisioneel is appelkoos konfyt as vulsel gebruik, maar ek het al aarbei en onlangs my Kweper en Turkish delight gebruik en die kinders het elke krummeltjie uit die bak gelek!~

Resep
280g Koekmeel (2k)
10ml Bakpoeier
3ml Koeksoda
3ml Sout
85g Margarien
1 Eier, geklits
125ml Melk
90ml Appelkoos konfyt

Metode:
1. Sif die koekmeel, bakpoeier, koeksoda en sout saam en vryf die margarien met jou vingerpunte in.

2. Meng die melk en die eier saam.

3. Meng nou die melk by die koekmeel met twee messe. Dus sny jy die nat bestanddele sodat die deeg goed gemeng word sonder om dit te oorwerk.

4. Druk die deeg aan mekaar en knie liggies vir 1 minuut. rol die deeg 1cm dik uit in ‘n reghoek.

5. Smeer die appelkoos konfyt oor en rol die deeg op.

6. Sny die rol in 3cm wieletjies en pak in ‘n gesmeerde bak met die ringetjies wat na bo wys.

Stroop
250ml Sagte Bruinsuiker
250ml Water
2ml Gemmer
2ml Kaneel

Metode:
1. Plaas al die bestanddele in ‘n kastrol en smelt die suiker. Kook vir 2 minute en voeg oor die wieletjies.

2. Bak die wieletjies by 190℃ vir 30-35 minute.

3. Bedien met lekker dik vla of roomys!

Bron: Annelien Pienaar, 2016, www.bosenbergguestfarm.co.za
Hoeveelheid: 6-8 porsies