In die Suid-Afrikaanse kos kultuur is appelkooskonfyt seker die voedsel item wat die meeste in geregte gebruik word. Dink aan jam tertjies, wildebees ogies of te wel lepel steeltjies, konfyt skywe, tussen lagie met koeke, asynpoeding, gemmerkluitjies, potjiekos souse, bredies, kerrie-en-rys, jaffels en die lys hou aan. Dus, moet elke huis ’n potjie appelkooskonfyt vir die wis en die onwis besit. Onthou dat wanneer appelkooskonfyt gekook word die kleur van die konfyt deur paar faktore bepaal word.
Hoe jonger die vrug, hoe ligter die konfyt. Hoe vinniger jy kook, hoe ligter die konfyt.
Hierdie resep vermeerder baie goed tot en met 10 kg.
1 kg appelkose, halveer
750 g witsuiker
5 appelkoos pitte (in gaasdoek verbind)
1 k water
Sprinkel die witsuiker oor die appelkose en pitte en laat oornag staan om vog te trek.
Volgende dag verhit die mengsel met die water baie stadig en roer aanhoudend. Was kante van die kastrol af en sodra die suiker opgelos het, kook baie vinnig totdat die mengsel verdik vir ongeveer 45 minute.
Bottel die appelkooskonfyt dadelik in gesteriliseerde warm flesse. Onthou om die pitte uit te haal.
Bron: Annelien Pienaar, www.bosenbergguestfarm.co.za
Hoeveelheid: 3 x 375 ml botteltjies
2 Replies to “Appelkoos konfyt”
Jeanetta Gouws
Middag Annelien
Wil graag hoor wat moet ek doen dat appelkoos konfyt nie uit die outydse jamtertjie koekk nie
Ek is raadop
Groete
Jeanetta Gouws
0820639186
Annelien
Jeanetta, as jy winkel appelkooskonfyt gebruik vir elke koppie konfyt meng 10 ml mielieblom met 50 ml water roer by die konfyt en kook in die mikrogolf tot verdik en skep dan lepels vol op ‘n koue bakplaat en vries. Anders as jy self konfyt kook, kook dit vir langer om dikker te word. Groete Annelien