Ons het as kinders preserveermiddel-vry grootgeword weens ’n diabeet sussie wat amper vir alles allergies was. Moeder het baie moeite met ons kos gedoen en almal was maar verplig om gesonder te leef. Met hierdie resep het ons grootgeword en tot vandag toe maak ek vir ons huis. Die suiker kan wel vervang word met kunsmatige versoeters, ek gebruik persoonlik vloeibare Natreen wat glad nie ‘’n nasmaak gee. Ongelukkig moet jy proe soos jy werk. Die ander nadeel van die kunsmatige versoeter is dat die rak lewe van die produk nie so lank is nie, daarom is dit belangrik om die produk in die yskas te stoor.
Eerste kooksel
5 kg rooi ryp tamaties, blansjeer (wanneer tamaties in klein hoeveelhede in warm kokende water gedompel word sodat die skille self kan los gaan. Mens skil nie ‘n tamatie soos ‘n appel nie, al die goedheid sit onder die skil en jy sny dit weg.) Dompel die tamaties vir 2 min kokende water, sit in koue water en trek die skille af.
1.5 kg uie, gekap
4 selderystingels, gekap
3 e fyn knoffel
1 k water
Kook al die bestanddele saam totdat die uie en tamaties sag is, neem ongeveer 60 minute.
Puree bestanddele in klein porsies en dreineer die sap deur ’n growwe sif. Gebruik die agterkant van ’n houtlepel om die moes deur die sif te vryf. Die gladde mengsel word nou by die tweede kooksel gevoeg.
Die pitte en vesel word nie verder gebruik nie. (Ek sal dit vries om sheba of tamatiesmoor mee te maak)
Tweede kooksel
1 l (4 k) asyn
600 g (3 k) suiker of vir diabete (3-4e) Liquid Natreen
100g tamatiepuree
1 k appelkooskonfyt
1 t neutmuskaat
1 k water
1 e sout
1 t fyn peper
Voeg die eerste kooksel by die tweede kooksel se bestanddele en kook die mengsel oor hoë hitte, vir ongeveer 60 minute om dik te word. Haal van hitte af en laat 10 minute afkoel voordat dit gebottel word.
Bottel die produk in gesteriliseerde flesse en draai bottel op sy kop. Dit help die stoom wat moontlik in die deksel vog vorm, om nie bakterieë in te laat groei nie. Met die omdraai slag sal die vog wat gevorm het eweredig versprei.
Bron: Annelien Pienaar, 2016, www.annelienpienaar.co.za, preservering klasse.
Hoeveelheid: 2.5 liter tamatiesous
8 Replies to “Tamatiesous”
Anri Britz
Baie dankie vir die preserveermiddel vry resepte soos die een. Ek waardeer jou harde werk en deel van resepte met ons kosliefhebbers!
Annelien
DAnkie Anri, loer gerus na my kookboek Boerekos met ‘n Twist wat nou vars op die rakke is. Daar is byvoorbeeld boerewors, biltong, witsous (droe mengsels), warm sjokolade ens ook wat geen preserveermiddels bevat en tot groot voordeel van jou gesin se gesondheid is. Groete en Twist voort, Annelien
Andrew du Toit
Dankie Annelien, Het gister die resep probeer en dit gehalveer want ons potte was net nie groot genoeg nie en die kassie tamaties wat ons gekoop het was net onder die 5kg toe gebruik ons maar 2.5kg en halveer als die bestandele. Ons het ook Xylitol gebruik as ‘n versoeter. Maar ek dink ons het hom nie genoeg laat koop op die ou einde nie. Die eerste sarsie was in die instapot vir ‘n uur gedruk. Die tweede sarsie was in ‘n oop SS pot gekook.
Annelien
Oe jinne jong…ek is nie baie te vinde vir die gebruik van spesefiek xylitol want dit is regtig nie geskik om mee te kook nie. Verhitting is nie gewens. Verder as iets nie dik is, moet dit langer gekook word sodat vog verdamp. Hoe groter die pot waarin jy kook se oppervlakte is hoe beter want hoe vinniger verdamp die vog. Hoop hierdie is ‘n paar punte vir jou om in die toekoms te onthou. Groete en laat weet hoe dit gaan met die volgende kooksels. Annelien Pienaar
Malinda Cassidy
Ooeeee! Baie dankie! My gade gebruik slegs All Gold tamatiesous. Gaan die vandag vir hom maak.
Annelien
Kom wys as julle gemaak het asb en dit is gesonder as ooit. Groete Annelien
Johan
Kan ek die suiker weglaat? Suiker is gif.
boerekostwist
Indien jy dit so wil doen sal jy die produk se raklewe aansienlik verkort en dan ‘n ompad moet kry om te preserveer soos om dan te bevries of canning tegnieke toe te pas. So ja jy kan maar dan moet jy bewus wees van die suiker wat in hierdie geval as preserveermiddel dien.
Groete
Annelien Pienaar