Roommielie-mieliemeel en spek broodjie (Suurdeeg opsie ook)

Mieliemeel is seker een van die gewildste stapel voedsels in Suid-Afrika. Ek het dit goed gedink om alle mielie meel wat ek my hande op kan lê te ontgin tov resepte. Hierdie is ‘n heerlike kamp broodjie wat ook oor die kole in ‘n gietyster brood potjie of ronde brood pot gemaak kan word. Die broodjie het vele variasies soos ek later in die resep ook aandui in die bestanddele lys. Ons bak dit soms as ‘n muffin vir die kosblikke en dan maak ek seker die protein deel is hoog vir die honger Filistyne van my. Die resep is vrieskas vriendelik nadat dit gebak het.

490 g (3 ½ k) koekmeel
140 g (1 k) fyn mieliemeel
15 ml (1e) bakpoeier
¼ t koeksoda
50 g (1/4 k) wit suiker
5 ml gegeurde sout van keuse (loer in my Vleis boek in die Soute souse marinade afdeling vir heerlike soute)
115 g (1/2 k) botter
350 ml melk, warm gemaak maar nie gekook, plaas botter hierby en laat goed smelt, laat dan afkoel
2 ekstra groot eiers
410 g (1 blikkie) roommielies (Klik op die rooi room mielie teks vir die resep om self room mielies te maak)
410 g (1 blikkie) heel pit mielies (gevriesde mielies of selfs vars mielies kan gebruik word)
1 k gerasperde cheddar kaas
1 k uitgebraaide en opgekapte spek of ham )Opsioneel)

Variasie kan tot en met ¾ k gebraaide uie, soetrissie, olywe, feta, spinasie puree gebruik word.

Metode
Voorverhit oond na 180 C en smeer twee tot 3 piesang brood pannetjies (half loafies). Hou eenkant.

Sif alle droe bestanddele saam en maak ʼn holte in die middel.

Voeg die eier by die afgekoelde botter mengsel, roer die mielies en res van bestanddele by.

Giet die beslag in die voorbereide pannetjies. Bedek met foelie.

Bak vir 55 minute, laaste 10 min verwyder foelie. Verwyder die broodjies uit die oond en laat effens afkoel voordat die brood uit gekeer word.

Indien kolwyntjies gebak word, bak vir 35 minute by 180C sonder enige bedekking.

Suurdeeg variasie: 
Vervang die melk deel soos volg: 200 ml suurdeeg plus 150 g melk plus 50 ml water en klits tot glad met n vurk.

Bron: www.annelienpienaar.co.za deur Annelien Pienaar 2021-10-07
Hoeveelheid: 3 half loafies of ongeveer 24 muffins