Vandag was ‘n dag vol verrassings. Ek het hierdie slaai die eerste keer by my Duitse skoonsus geëet jare gelede. So het ek die resep by haar gekry en soos die jare verby gegaan het, het ek nie dit in ‘n harde kopie aangeteken nie en die papiertjie het verlore geraak. Ek het maar so op gevoel die slaai gemaak maar daar was altyd ietsie kort. Vandag toe ek my rekenaar aansit kry ek ‘n FB inbus van Charmaine Louw met die presiese resep soos wat Christa dit vir my gegee het! Tot op die woord en letter presies net so! Baie dankie Charmaine vir die resep.
Ek kan julle verseker dat hierdie slaai voorwaar ‘n treffer is. Hierdie is ‘n slaai wat niks van oorbly nie, dit word vinnig opgeraap! Die slaai word net voor opdiening aan mekaar gesit en die slaaisous op die laaste minuut oor gegooi. Hierdie is ‘n resep wat regtig bewaar moet word. Soms sit ek bietjie feta by vir variasie of bokmelk kaas…lekker speel en geniet!
VARS SLAAI
2 Klein groen kooltjies – fyn gekap
1 Ui of sprietui – fyn gekap
1 Bakkie mangetout – fyn gekap (sien foto)
1 Seldery stingel – opsioneel
½ k Koljanderblare of pietersielie na smaak – gekap
METODE
1. Meng al die bestaddele saam.
KRAKERIGE LAAG
100g Amandelvlokkies of neute van keuse
1 Pakkie 2 min noedels (hoendergeur)
125 ml Sonneblomsaad
100 ml Sesamsaad
Plaas al die bestanddele in ‘n kleef vrye pan en rooster die amandels, noedels wat jy grof breek met die hand, sesamsaad en sonneblomsaad saam totdat die amandels begin verkleur.
Gooi die bestanddele dadelik uit in ‘n aparte bakkie, anders gaan die amandels brand.
SOUS
125 ml Olie
65 ml Sagte bruinsuiker
65 ml Wit asyn (ek gebruik wit balsamiese asyn as dit invoorraad is)
15 ml Sojasous
5 ml Hoendergeursel (wat in pakkie was) – opgelos in 15 ml kookwater
Meng die olie, bruin suiker, asyn, soja sous en hoender aftreksel saam.
Net voor opdiening word die slaai netjies op ‘n plat slaai bak oopgestrooi. Daarna volg die krakerige neute en dan die sous. Onthou hierdie is nie ‘n slaai wat kan oorstaan tot die volgende dag nie. Die pasta gaan pap word.
HOEVEELHEID: 6 – 8 persone.
8 Replies to “Krakerige Koolslaai”
Helena Makinen
Wat is mangetout? Ek het na die foto gekyk en weet steeds nie wat dit is nie. Is dit snap peas? Gisteraand het ek so gelag want Google is totaal deurmekaar. Toe ek op die Engelse vlag druk, sê hulle dat ek ‘n pickup nodig het. Toe ek vir Google translate vra is hulle antwoord dat ek alles moet eet. Jy’t gesê dat daar niks gaan oorbly nie, en nou vertel Google vir my dat ek alles moet op eet. 🙂
Annelien
Ja dit is snap peas. Aai vrou…ek lag ook want die tale is soms ‘n konsternasie. Liefde Annelien
Sonette Vermaak
Ek het verlede week hierdie slaai gemaak. Jy is reg – dis ‘n treffer!!! Daar het niks oorgebly nie. Dis baie baie lekker!! Ek geniet jou resepte en die nuusbrief. Dit voel of jy al ‘n vriendin is! Groete, Sonetté
Annelien
Hallo Sonet, saam met BKT is ons vriende vir altyd. Mag jy die tye met BKT se resepte sommer baie geniet. Groete Annelien
Anne-Marie Fourie
Hi Annelie, die klein kooltjies, hoeveel is dit in maat omtrent, want hier moet ons vat wat ons kry in Namibië, g’n niks keuses nie.
Annelien
Anne-Marie, jy kan so 2 kleintjies kry. Groete Annelien
Wilna Annandale
Hallo Annelien met wat kan ek die kits noodels en hulle sous vervang om dit gluten free en nog lekker te maak of kan ek dit net uitlos. Groete Wilna
Annelien
Jy kan rys noedels net diepvet braai vir dieselfde doel. Groete Annelien