Soms het mens net ‘n naweek se breek nodig om die batterye te laai, maar meer nog, om nie jouself die heeldag voor die kospotte te vind nie. Ons is baie lief as gesin vir aartappels in enige vorm of geur en ‘n heerlike vullende stysel daarby. Saam met hierdie aartappel slaai is daar niks so heerlik soos die gesellige gesis van vleis oor die kole. Wat wonderlik is van hierdie gereg is die feit dat dit ook heerlik werk saam met vis, hoender, vark, wild en rooivleis. By ons besigheid Tannie Slaai, in Hartbeespoort, is dit juis my fokus om vir naweke weg vir die kliente oulike en praktiese disse te ontwikkel. Hierdie resep is juis een van daardie…met sy eie kinkel by. Kom kuier vir ons in die mooie Harties!

Die geheim van hierdie gereg is dat dit vir ‘n dag staan om goed te marineer, daarna kan jy fyn gekapte biltong oor strooi. Ek hou persoonlik van wind droe springbok biltong, maar indien jy nie dierlike proteine nuttig, kan jy sterk kase soos gorgonzola, grana pandana, pecorino of parmesaan oorweeg om oor te sprinkel. Dus is hierdie ‘n uiters veelsydige slaai. Dit hou ongeveer 7 dae in die yskas en hoe langer dit staan hoe lekkerder word dit. Bedien liggies verhit of koud.

Resep

1 kg baba aartappels, gaar in baie sterk soutwater gekook, geskil en dan halveer. Onthou die geheim van hierdie slaai is die feit dat die marinade oor die warm aartappels gegiet moet word sodat die geure diep kan intrek.

1 medium rooi ui fyn gekap en met n knippie sout en bietjie olie gebraai in ‘n pan of ‘n handjie vol sprietuie fyn gekap.

1/4 k olyfolie
1 t knoffel, vars en fyn gedruk
2 e balsamiese asyn of soja sous
1 e heuning
1 e mosterd, glad
¼ k mayonnaise
1 t origanum
¼ t gerookte paprika
Knippie sout en wit peper na smaak

Meng bestanddele goed deur om te meng. Giet oor die aartappels en meng met ‘n houtlepel versigtig deur sodat die aartappeltjies nie op breek.

Stoor oornag vir geure om te ontwikkel.

Sprinkel dan met ½ k fyn biltong of dun repies op gesnipperde biltong. Nou dat ek daaraan dink ek is dol oor salami stukkies of cabanossi daarby!

Mag jy en jou gesin heerlik smul aan hierdie resep.

Boerekos met ‘n Twist groete

Annelien Pienaar
Skrywer van Boerekos met ‘n Twist en Vleis die omvattende gids (Beskikbaar in Engels en Afrikaans reg deur SA en ook Internasionaal).

Bron: www.annelienpienaar.co.za deur Annelien Pienaar, 2023
Hoeveelheid: 4-6 porsies