Hallo Twister,

Die week het gevlieg en met die dae wat verby gaan besef ek net…die end van die jaar begin wink vir my. Elke jaar maak ek maar die geskenke kas vol, soms net met idees, maar dit begin gestalte kry vir Kerstyd. Kerstyd is vir ons ‘n fees van GEE en dankie sê aan almal wat ons lewens die afgelope jaar verryk het. Hierdie jaar merk die 4de jaar van my Geskenke uit jou koskas klas/demonstraie. Daar is net een sessie en gewoonlik die laaste Saterdag van November. Maak nou al ‘n nota vir daardie dag. Dit sal ‘n demonstrasie klas wees en almal eet en kuier na die tyd saam. Ek het oulike en vernuwende idees en kan nie wag om te begin. Die nuwe Boerekos with a Twist cookbook is nou ook beskikbaar en aanlyn tans weer op ‘n spesiale aanbieding by www.loot.co.za

Julle sal sien ek sal teen volgende week die nuwe klasse en toerplan deur Suid-Afrika laai. Ek het tot en met September min klas by die BKT ateljee en baie op reis.

Vir hierdie week se arsenaal van resepte het ek vir julle die volgende resepte gelaai:
Marmite tert of koek
Wildspastei met ekstra naeltjies
Kook van eiers
Karamel Fudge

Ek werk tans aan die Karamel lekkers en ook Toffie resepte. Die Karamel lekkers is heerlik. Dit neem egter ‘n tydjie om te maak maar die beloning is baie groot. Die lekkers droog vir 2 dae sodat die buite kante hard word en die binnekante sag en romerig. Oe, ek praat myself nou skoon kwylbek! Hopelik kan ek dit môre gemaak kry en teen sondag die foto’s geneem kry.

Soos vertel hierdie week hou die jongste Filistyn vir my baie besig so met haar onderskep van hondetandjies om aan die tandemuis te verkoop, tot haar boetie wat haar middel twee gaan breek omdat sus die LEGO boot se mas gebreek het. Tussen in het ons twee weer begin stap en sus ry fietsie. Sal nog eendag ‘n foto van die fietsie neem. Haar mooi fiets wat sy twee jaar gelede gekry het, het voete gekry met ‘n vakansie. Tuis gekom en sy het onthou van een van haar niggies se ou fietse in die stoor. Die fiets is aan mekaar gesit met ‘n gelas van wiele en dinge om dit rybaar te maak. Ag, mense…die een wiel is wit en die ander is swart gemonteer op ‘n pers raam! Sus is baie tevrede met haar lappies fiets en wil niks weet van ‘n nuwe een. Gelukkig pas die fiets haar nog en sy en Blikkies ry die wêreld vol stof wolke. Sus het ook uitgevind hierdie fiets se briek werk baie goed en briek sulke lang swart strepe in die stoor tot groot vermaak van Blikkies wat die bande probeer hap! Ek wag nog vir die dag dat sy oor sy tone ry. Tot dus ver het dit nog nie gebeur.

Onthou ons kraak nou die 2018 Pekan oes. Diegene wat graag wil bestel in SA, ons koerier landwyd. Klik op hierdie skakel om verdere details te kry: Skeerpoort Pekans 

Mag julle ‘n wonderlike nuwe week beleef en BKT Klets groete hier van die plaas aan ieder en elk.

Annelien