My Ma en haar sussie was in Skeerpoort as die “Sonskyn Susters” bekend omdat hulle altyd aan die lag en kook was. As ek een woord vir die 2 dames moes gee, hulle was BORRELLEND!
As ek aan hierdie fudge dink dan, dink ek aan daardie soet herinneringe van klein tyd met hulle twee. Hulle was onafskeidbaar tot die dood.
Wenke voor jy begin: Tydens die kook van fudge word vog basies verminder deur dit met die kookproses te laat verdamp. Suiker karameliseer en suiker kristalle word meer gekonsentreer. Om haastig te wees en vinnig te kook gaan jou fudge laat brand en raai wat, moenie dink dat as jy vinniger kook die vog vinniger gaan verdamp nie. Dus kook stadig en neem ‘n suiker of olie termometer en meet die mensel se temperatuur 115C bereik. Kook stadig sodat die karamelisasie kan plaasvind sonder om te skroei. Punt is: GEDULD!
1 blik kondensmelk
3 kop suiker
1 kop melk
250 g botter of Rama / Stork bake
knippie sout
Smeer die kastrol waarin jy die fudge gaan kook, se bodem en kante eers met olie uit. Dit sal voorkom dat dit aanbrand. My ou stoompot werk wonderlik vir hierdie resep, dit het nog nooit aangebrand nie.
Voeg al die bestanddele in die kastrol en roer oor lae hitte totdat al die suiker opgelos het. Was die kante van die kastrol af as daar suiker kristalle tydens hierdie proses vasklou. Vat ‘n kwassie en maak dit klam met water en vee die kristalle af. Die olie teen die kante help ook dat die suiker nie vas sit en die was proses maklik maak.
Sodra die suiker mooi opgelos het laat die mengsel by medium hitte kook totdat dit karamel bruin word en dik is. Roer af en toe, stadig met jou houtlepel. Na die einde se kant toe, geen roer! Dit kan enige iets van 40 – 60 minute neem (dalk langer a.g.v. hoogte bo seespieël). Onthou dit moet ‘n dik massa word. Sodra die kante van die kastrol af geskraap word soos jy roer en sien dit maak sand suiker is die mengsel amper gereed. Skep bietjie op koue piering uit en toets na ‘n minuut of dit sandsuiker word. Indien jy ‘n suiker termometer besit moet die temperatuur ongeveer 115C bereik om perfekte sagtebal stadium te bereik…118C is amper te ver.
Voeg geursel van jou keuse by. Klop die mengsel goed met ‘n houtlepel. Ek speel baie met die geure, Amarula, karamel essence, koffie ekstrak, vanielje geursel en vele meer. Jy kan ook hier neute wat vooraf warm gemaak is by die laaste stap invou, Milo, sjokolade splinters.
Skep dadelik uit in vooraf gesmeerde oondpan. Laat effens set, sny in blokkies en laat verder afkoel.
LEWER: Halwe oondpan of 2 pannetjies 20 cm x 20 cm
BRON: Die Sonskyn Bezuidenhout susters! Hantie en Ina. Annelien Pienaar
Met hierdie rede hoeveel geursel asb? Vanilla essence of as ek amarula Wil insit.
Harriet, afhangend hoe sterk die geursel is, veral as dit in olie konsentraat is paar druppels, as dit meer waterbasis is 5-15 ml maar dit sal jy moet proe soos jy aangaan. Vir Amarula gooi ek soms ‘n kwart koppie by. Groete Annelien
Hi Annelien. Ek het nou hierdie fudge al 3x genaak. Dit kom nie een keer dieselfde nie🤦♀️ek verstaan dat mens nie altyd ewe veel roer nie, of dalk langer of korter kook,
Maar my vraag is. Waarom kom dit nie romerig nie? Dit bly elke keer voel of die suiker nie mooi gesmelt het nie. Dit voel sandsuikerig op jou tong. Ek werk met my termometer. Nie oor 115° nie. En dit brand vrek maklik. Maar dit bly lekker. Sou dit net graag meer romerig wou he. Baie dankie en mooi aand.
Hallo Riana, die probleem is jy kook die mengsel te vinnig. Hoe weet ek dit? Die suiker kristalle gee die geheim weg. Gebruik ‘n kastrol wat jy weet nie maklik aanbrand. Smeer daardie kastrol se bodem goed met botter, nie margarien. Maak seker voordat die mengsel kook dat die suiker opgelos het. Wanneer jy die dik toffie deel roer so daar na die einde se kant toe sal dit sulke klein bruin amper branderigheid maak…moenie kommer dit is die karamelisering wat plaas vind. Roer baie, baie versigtig. Sodra jy die mengsel van die hitte haal klop jy vir hom goed met ‘n whisk of hout lepel. Onthou hierdie is nie soos ‘n American fudge wat met glukose stroop gemaak word. Indien jy so ‘n romerige en gladde fudge wil he, probeer asb die mikrogolf fudge op die webtuiste. Hou my asb op hoogte hoe dit gaan. Maak seker in die toekoms dat jy die kastrol merk en ook die plaat waarop jy gewerk het asook stoof verstelling. So sal jy konstante resultate kry. Groete Annelien
Die resep wat ek maak basies dieselfde, ipv drie koppies vier koppies suiker. Hoekom sou mens die neute warm maak Annelien? Wil graag maak met macadamia neute
Koue neute sal die mengsel dadelik laat stol. Jy wil dit nie he…dan gaan jy ‘n bol eindig wat nie mooi plat gaan. Groete Annelien