Hoender Schnitzel met Bêre mengsel kaas sous en gevulde sampioene

Hoender Schnitzel met Bêre mengsel kaas sous en gevulde sampioene

Episode 3 van Boerekos met ‘n Twist, Seisoen 1, saam met sanger Arno Jordaan was een groot fees gewees. Hy het self hierdie wonderlik ete aanmekaar geslaan onder my wakende oog. Binne 30 minute was daar gesonde kos op die tafel. Die program se doel is om jou te leer om hormoonvry en preserveermiddel vry te leef. Kyk na die kwaliteit van vleis wat jy aankoop en by wie, ken jou slagter persoonlik. Vra die regte vrae. Saam met hierdie program het ek gaan kyk hoe ek jou tyd in die kombuis kan spaar maar ook iets uit elke resep te leer. In die volgende resepte is daar die Witsous Bêre mengsel uit my Boerekos met ‘n Twist kookboek. Hierdie mengsel het my moeder elke naweek as ek tuis kom van Universiteit af, vol gemaak om seker te wees ek eet genoeg. Ek het natuurlik van pasta geleef! Hoop jy geniet elke episode van BKT!

Schnitzel
Lewer 4-6 porsies

Vir my gesin is hierdie ons “kitskos” oor naweke of op dae dat daar te min tyd is vir lang kosmaaksessies. Die schnitzels kan met welslae bevries word; gebruik dan soos nodig. Die geheim van die resep lê in die meelmengsel. Die schnitzel bak perfek sonder dat krummels verlore gaan, terwyl die vleis heerlik sappig binne is.

280 g (2 k) koekmeel
240 (2 k) mielieblom
30 ml (2 e) hoenderspeserye
2 ekstragroot eiers, liggies geklits
125 ml (½ k) melk
360 g (3 k) droë witbroodkrummels
3 hoenderborsies, gehalveer, of gebruik bees-, vark- of selfs vissnitte

Sif die koekmeel, mielieblom en hoederspeserye saam en keer dit uit in ’n vlak bord. Klits die eiers en melk saam en keer dit uit in ’n vlak bord. Plaas ook die broodkrummels in ’n vlak bord. Nou het jy 3 borde met die verskillende lae waarmee die vleis bedek moet word.

Begin deur eers die vleis in die melkmengsel te doop. Doop dit dan in die meel en druk die meel vas; sit die vleis eenkant vir 10 minute sodat die meel goed kan vaskleef. Doop die vleis daarna weer in die melkmengsel en strooi broodkrummels oor. Druk die broodkrummels oraloor die vleis vas. Plaas die schnitzels op ’n bakplaat en sit dit in die yskas vir 1 uur sodat die krummels kan bind.

Die vleis kan op hierdie punt bevries of gaargemaak word.

Volg een van twee gaarmaakmetodes:
* Vlakbraai die schnitzels aan albei kante vir ongeveer 4 minute aan elke kant, of
* Spuit ’n bakplaat met kleefwerende kossproei en plaas die schnitzels daarop. Bak dan vir 25 minute en draai die vleis ná 12 minute.

Sit warm voor met kaassous gemaak van die Witsous bêre mengsel in die Boerekos met ‘n Twist kookboek.

Witsous-bêremengsel p.211 Boerekos met ‘n Twist kookboek
Lewer 20 porsies

Gevulde Sampioene
6 porsies

6 bruin sampioene
3 t knoffel, fyn
6 e olyf olie
500 ml witsous, medium dikte p. 211
1 k cheddar kaas
½ k uitgebraaide spek stukkies
½ k droë broodkrummels

Voorverhit oond na 180 ℃ en smeer ‘n bakplaat.

Vee sampioene met klam lappie af of skil.

Pak sampioene in die bakplaat en sprinkel ‘n halwe teelepel knoffel oor elke sampioen. Volg op met ‘n eetlepel olyfolie in elke sampioen. Laat marineer vir 30 minute.

Vul elke sampioen met witsous en rond af met kaas, spek en dan broodkrummels.

Bak vir 30 minute by 180 ℃.

Wenk: 1. Die klaar gevulde, ongebakte sampioene vries baie goed. 2. Sampioene kan ook direk oor die kole gebraai word. 3. Sampioene kan ook gedroog word om soppe en souse te verdik: Resep vir gedroogde sampioene

Volg Boerekos met ‘n Twist op FB: BKT Faceboek groep

Beste wense vanuit my BoereKosTwist Ateljee op Bos en Berg gasteplaas!

Annelien Pienaar

 

2018-04-24T10:00:53+00:00 0 Comments

Leave A Comment