BKT Klets-kombuis Week 8

BKT Klets-kombuis Week 8

Hierdie week is in ‘n kits woerts verby. Baie dinge wat oor mens se pad kom om jou fokus soms te wil verskuif en dalk mismoedig wil maak. Dan kyk mens op soos ‘n verlepte papawer en sien die helder son en glimlag…môre gaan dit weer beter. Na die ongeluk in die kombuis waar ek my vinger so sleg gesny het, het ek besef hoe bevoorreg my vriendinne en selfs my sussie is met ‘n skoonma of selfs ‘n tante wat kan help as daar krisisse is. Tussen myself en manlief is dit soms so ‘n gespook om by die kinders uit te kom dit is ‘n aardigheid. Ek het met Vaaltyn dag besluit elke liewe vriendin van my kry ‘n heerlike koekie gebak uit my kombuis met ‘n mooi “liefie-briefie” by om hulle te vertel…”Haai ek staan van buite en sien hoe spesiale mens jy is en dink jou lewe is ongelooflik. Leef voluit.” Ek hoop julle het ook al die liefde gevoel soos ek die resepte en foto’s gedeel het Woensdag. Daar is ‘n spesiale Sjokoladewerk klas  versoek gewees vir die 24ste Februarie, klik op die rooi deel om na die Event details te gaan. Nuwe klasse word volgende week gelaai. Daar is twee nuwe resepte hierdie week gelaai: Suurlemoen Vlatert en Beet Marmerkoek . Beide resepte is tegnies van aard en jy gaan sommer baie leer. Die Suurlemoen Vla  tert se meringue leer jou paar wonderlike lesse om die perfekte tert te maak wat nie platval, water druppels maak of daardie slymerige lagie wat vorm te voorkom tussen die lae. Die Beet Marmerkoek het ook sy eie soortige kinkel om ‘n spiraal ogie te vorm. Hoop julle gaan sommer heerlik bak en kuier in die kombuis.

Ja, met dit saam om huis en haard te laat klop, kom die verantwoordelikhede van die kombuis en my gesin se liggaamlike onderhoud. Ek is eerlik as ek sê ek leef uit my vrieskas uit. Die dae raak soms lank, ek gaan weg vir werk en dan moet daar ‘n gekookte ete gereed wees as die Filistyne tuis kom. Oor die jare heen het ek maar ‘n stelsel vir myself uitgewerk tussen die Drukkoker, Slowcooker en my Vriekas-kos. Die dae wat ek wil vars eet dan span ek die Slowcooker in…laai die kos net voordat ek ry vir die Filistyne en al die middag aktiwiteite. Met tuiskoms, is dit die heerlike geure van gaar kos wat ons begroet. Sakke word sommer so neer gegooi in die gang en die tafel word deur die manne holderste bolder gedek.

Sussie trek uit en help met haar eie manier van slaaitjie maak. Wat sy ookal kan vind in die yskas wat op haar oogvlak is kom in die slaai. Ons kry soms snaakse kombinasies van ‘n groen slaai, maar die boeties waag nie ‘n woord want hul weet hul kry volgende keer ‘n beurt met slaai maak. In my huis het elke kind van kleins ‘n stywe rotine gevolg en dit het outomaties by hulle dissipline gekweek, sonder ‘n geskree en raas word dinge gedoen. Soms raak die kinders nukkerig, maar dan weet mens ook daar is goedjies wat krap en praat oor dit wanneer hul so voel. Elke kind het dus in die Pienaar span ‘n funksie en sonder hul insette kan die wiel nie draai.

Nou kom ons by ‘n baie senitiewe kwessie: Kanker. Tans is ek besig met navorsing vir ‘n skripsie in Kanker-voedingstatus. Indien jy sou belangstel en deur kanker geraak is self of ‘n familielid versorg het…sal ek baie graag die volgende vrae wil vra en hoor wat jou mening en ondervinding was. Beantwoord asb die vrae onder aan hierdie artikel by “Comments” asb. So kan almal saam lees en ook makliker rekord hou van die inligting. Jy het nie nodig om elke liewe punt te beantwoord nie, maar dit sal my baie help om my navorsing en skripsie deeglik te kan uitwerk. Ek werk saam met twee Onkoloë en ons kyk na alternatiewe benaderings om julle liggame instand te hou voor, tydens en na behandeling.

1. Voor behandeling het jy enige aandag aan jou voedingstatus gegee?
2. Tydens behandeling:
a. Smake en teksture wat gepla het?
b. Hoe het jou eet rotine verander?
c. Maklik sekondêre infeksies opgedoen?
d. Was vaste kos of ‘n “liquid” diet vir jou makliker om te volg.
e. Porsie groottes, wat is vir jou ‘n haalbare porsie gewees om te eet.
f. Het jy cravings gehad?
g. Hoe was jou energie vlakke na behandeling en wanneer het dit weer begin optel?
h. Toe jy in remissie gegaan het, het jou eet patrone verander of dieselfde gebly.
3. Enige iets wat jy voel ek moet weet of dalk mee kan help om die voedingstatus en eet rotines van ‘n kanker pasient te verbeter?

Mag ieder en elk ‘n heerlike naweek geniet en baie, baie dankie vir al die kuiertjies op die Boerekos met ‘n Twist blad op Faceboek. Julle is algaar…bakgat Twisters!

BKT Klets-kombuis groete

Annelien Pienaar

2018-02-16T17:09:52+00:007 Comments

7 Comments

  1. Alda Cilliers February 16, 2018 at 10:36 pm - Reply

    Nie genoeg aandag aan gebalanseerde dieet gegee nie. Was baie oorgewig. Borskanker. Het na 7 chemo’s 20kg verloor. ALLES het vir my sout geproe veral tee. Al wat ek eintlik geëet het vanaf dag 3 to 10 na chemo was Golden Delicious appels! Die vars smaak en sappigheid was vir my lekker. Kaas en suiwel het vir my aaklig gesmaak en ek vermy dit steeds. Ek het gesukkel om te eet omdat my mond vol seertjies was en my maag op hol geraak het. Ek was net nie lus vir die moeite om te eet nie! Ek was sonder fut. ‘n Dieëtkundige het my die dag na my 6de chemo eers gespreek in die chemokamer.) Sy het Fresubin aanbeveel en dit het die lewe vir my baie makliker gemaak. Ek het ook gevoel dat ek my kragte baie vinniger herwin het. Was regtig spyt dat ek dit nie vroeër geweet het nie. Tans in remissie. Eet baie meer gebalanseerd en gee veral aandag aan groente. Eet klein porsies en meer dikwels.

  2. Magda Nel February 17, 2018 at 5:57 am - Reply

    In my man se geval het hy voor hy gediagnoseer is , cravings gehad.. Hy het ‘n vreeslike lus gehad vir mieliepap en maalvleispasteie. Voor die tyd het het ons relatief gesond geëet op ‘n soms baie knap begroting agv ander mediese verpligtinge.
    Tydens chemo, het sekere teksture, smake en geure hom gou gevang…. Sommiges soos bv yogurt is hy tot vandag toe nie lief voor nie, agv die assosiasie met chemo smaak in die mond. Kon in daardie tyd geen rooivleis inkry, maar wel bietjie hoender… Soms was dit vloeibare voeding omdat die mond seer was.
    Tans eet hy steeds geen uie nie omdat chemo die derms beskadig het, en met te veel gas maak dit barsies wat geneig is tot ontsteking. Verder probeer ons suiker en chemiese stowwe, soos geursels en kleursels beperk en eet vars sover moontlik. Hy is nou ‘n klein vleiseter en moet verkieslik vroegaand eet en ontbyt hou hy van sy Future life.monitor maar so met die tyd wat werk en wat nie…

  3. Barbara Grobbelaar February 17, 2018 at 6:05 am - Reply

    Thank you for sharing your next project. I am looking forward to the results of your research. As mentioned before, for a number of years I have been a member of an NPO and we support Children with cancer. I have worked very closely with the children and their families and I know one of their biggest headaches is getting children to eat anything…never mind anything healthy!! Because of meds, BMT, chemo, steroids, cortisone etc, their immune systems are very compromised so they are very susceptible to infections…which are often life threatening. Some meds make tge children ravenous like the steroids…I have seen a 16 year old boy eat 12 toasted ham and cheese sandwiches in one sitting! Other times they have so many sores in their mouths and throat they refuse to eat anything. I know the oncologist is pretty strict when it comes to the children’s diets but unfortunately some parents feel as long as they eat something it doesn’t matter what it is. I know the big no no items are sugar in any form…sweets, soda etc. No preservatives. Absolutely no biltong. No fast foods. All fruit and veges must be peeled. As much fresh fruit and veges as possible. Although I must say this is usually the last thing children want to eat. We have found that the children seem to love popcorn…unfortunately the parents use microwave popcorn…in hospital that is obviously the easiest but by far the worst. I do have a number of books, pamphlets etc on this subject and you are more than welcome to borrow if you wish. I look forward to your results of your work. God Bless. 🌷

    • Annette February 19, 2018 at 9:50 am - Reply

      Hi Barbara,

      May I ask why Microwave Popcorn is not good?

      My friend son have leukemia and also the oncologist say that a microwave is not good?

      Do you suggest that she do the popcorn on the stove with a little bit of olive oil?

  4. Louisa Pretorius February 17, 2018 at 3:51 pm - Reply

    1. Net probeer om nie gewig op te tel nie.
    2. a. Tydens my 1ste chemo kon ek gladnie wyn drink nie, vreeslik sleg, daar was ander ook maar dis 3 jaar gelede, kan nie meer daardie detail onthou nie.
    b. Probeer meer groente en vrugte eet.
    c. Mondsere ontwikkel asook tandinfeksies.
    d. Vaste kos verkies, maar dan groente- en vrugtesap. Het nie veel van d voedingspoeiers gehou nie, het wel probeer as my mond te seer was.
    e. Gewone/kleiner posiegroottes v dames.
    f. Beslis, sjokolade en roomys.
    g. Na behandelings, ek het 3 verskillende chemos gehad, waar my energievlakke na behandelings laag was en na 3 weke as ek begin beter voel het, moes ek weer behandeling gekry het.
    Die laaste reeks wat 22 Des geeïndig het , het erge bykomende newe effekte gehad, gelukkig word dit elke dag minder.
    My eetpatrone het meestal nie verander nie.
    3. Ek was nog nie regtig in remissie nie. Begin 19e met n reeks v 10 bestralings.
    Leiding om eetgewoontes te verbeter sal v my baie beteken.
    Groete

  5. Veronica February 17, 2018 at 4:22 pm - Reply

    Lief jou briefies♥️

  6. Leonie Kraamwinkel February 19, 2018 at 10:29 am - Reply

    My sussie is op 53 met n ellik kolon ca gediagnoseer. Die gewas is chirurgies verwyder en sy het onmiddellik begin met
    chemoterapie vr ‘n jaar. Daarna is sy driemaandeliks gemonitor met bloedtoetse en drie jaar later is longkanker by haar gediagnoseer. Haar lewensverwagting is op 4 maande geskat en sy is dan ook 4 maande later oorlede.
    (Sy het nooit gerook nie)

    1. . Nee
    2. a. Onmiddelllik naar na eerste chemo en dit het t haar eetlus beinvloed. Teksture was nie die probleem maar smake
    wel.
    b. ‘Haar eetroetine het verander in die sin dat sy heelwat minder ge eet het en baie kleiner porsies aanvanklik totdat
    sy later omtrent niks kon binnehou nie.
    c. Infeksies was nie ‘n probleem nie
    d. Ek het later begin om vir haar ensure te gee, nie omdat dit ‘n voorkeur was nie, maar bloot om iets in haar liggaam
    te kry
    e. Porsiegroottes was nie ‘n faktor nie, dit was ‘n uitdaging om iets te kry wat sy enigsins kon inhou of kans gesien het
    om te eet. Dit was maar hoofsaaklik bietjies kossies heeldag.
    f. Geen cravings
    . g. Energievlakke het het konstant gedaal al van voor die longkanker diagnose. Ek het haar by aan huis versorg want
    sy was nie getroud nie en sy was basies bedleend van dat sy met die longkanker gediagnosser is, juis a g v die
    feit dat sy so moeg was. Die kanker het haar dan ook 4 maande later opge-eis.

    3. My persoonlike mening is dat die invloed van chemoterapie op paasiente verskil en dat mens nie werkilk ‘n vaste
    “resep” kan uitwerk wat vir almal gaan werk nie. My ondervinding was dat dit goed vir ons gewerk het om vir my sus
    te vra waarvoor sy kans gesien het en dan het ek dit vir haar gemaak. Dikwels het dit gemors, maar soms het sy
    darem iets in haar lyf gekry en dan was dit genoeg beloning..

    Sterkte met hierdie groot taak wat jy aangepak het.

    .

Leave A Comment