Patat en karamel rol

Patat en karamel rol

Patat rol is iets wat ek mee grootgeword het as my pa vir ons snoek gebraai het. Moeder het die patats in ’n kasserol bak gaargemaak en dan die velletjies afgetrek. My dae is so vol dat ek maar gou die patats skil en gaarkook in water, maar die soetheid gaan tog verlore met hierdie praktyk. Daarom vir die lekkerste smaak in die gereg in te bring…maak gebakte patats.

Gebakte patats: skrop die patats skoon en plaas in kasserol bak en bak vir 1 ½ uur tot sag by 170 ℃. Laat afkoel en trek velletjies af en maak fyn.

Gekookte patats: skrop en skil die patats. Plaas ringetjies van patats in warm water in wasbak met ¼ k suurlemoensap of 2 Vit C tablette fyngemaak om verkleuring te voorkom. Plaas in kastrol met net genoeg water om patats gaar te kook. Sodra die patats sag gekook is, dreineer die water en maak fyn.

1 rol (400 g) skilferkors deeg, in yskas gehou tot nodig
500 g (2 – 3 k) gaar patats fyn gedruk
¼ t kaneel
¼ k sagte bruinsuiker (treacle, muscavado)
3 e botter
2 piesangs, fyn gedruk met 1 e suurlemoensap bygemeng
1 k sagte bruinsuiker (treacle, muscavado)
1 ½ k room

Voorverhit oond na 180 ℃ en smeer oondvaste glas bak van ongeveer 20 cm x 12 cm uit met Pan smeer op p. 13 van Boerekos met ‘’n Twist. Plaas eenkant. Wenk: oor die gebruik van bak in oondvaste glas. Die pasteideeg in hierdie geval sal eweredig deurbak sonder om kluitjie te maak aan die onderkant. Onthou dit vir wanneer jy weer ‘n ander sout pastei bak.

Voeg fyn piesang, kaneel, ¼ k sagte bruinsuiker, botter by die warm fyn patat en roer goed deur. Krap die mengsel oop sodat dit gouer kan verkoel. Daarna net in die yskas goed verkoel tussen 30 – 60 minute. Wenk: Ek kook en bêre reeds hierdie mengsel en vries, haal uit soos benodig. Met hierdie mengsel maak ek ook my Patat poffers in Boerekos met ‘’n Twist die kookboek p.40.

Sodra die patat mengsel afgekoel het rol die deeg op ‘n meel bestrooide oppervlakte uit sodat dit ongeveer 2 cm na beide kante langer word.

Skep die verkoelde patat mengsel op die deeg uit en versprei eweredig oor die deeg. Rol die deeg vanaf die lang kant op sodat jy ‘n langer rol kan kry. Deel die deeg in 9 eweredige dele. Pak in rytjies van 3 in die oondvaste glas bak. Sprinkel met ½ k van die sagte bruinsuiker en bak vir 20 minute by 180 ℃.

Haal gebak uit en sprinkel oorblywende koppie sagte bruinsuiker oor en volg op met die koppie room…jy kan maar so ‘n tjirtsie meer room bysit as jy wil.

Bak vir verdere 25 minute by 180 ℃.

Bedien warm.

Bron: Annelien Pienaar, 2017
Hoeveelheid: 4-6 porsies (hierdie resep verdubbel perfek en baktyd het geen aanpassing nodig nie)

 

Print Friendly, PDF & Email
2017-10-26T14:26:30+00:00 0 Comments

Leave A Comment