Hierdie wonderlike resep het ‘n pragtige storie. Maar voor ons begin wil ek vir julle die variasies op hierdie heerlike resep uitwys. Ek het in hierdie foto van die koek, ‘n piesang variasie gedoen en my Filistyne het vinnig die koek laat verdwyn. Die kombinasie van sjokolade en piesang is heerlik. So ook met die byvoeging van Moirs Crimson red, kry jy die aller mooiste redvelvet koek. Sien asb die aanpassings op die resep onder Wenke. Die ander naam vir hierdie koek is ook die Miljoeners koek by ondersoek! Hierdie resep kan ook as gluten vry gebruik word deur my Gluten vrye meel resep te gebruik in presies dieselfde mates. Ek vra baie mooi, met die standardisering van hierdie resep het ek egter gevind dat as jy nie weeg maar koppie mates oorweeg, jy gaan sukkel met ‘n besonderse stywe beslag. Daarom lees asb die volgende artikel oor hoe om bestanddele korrek af te meet met maatkoppies: Meet van Bestanddele.

“Ons het vir baie jare langs dieselfde mense in Middelburg gewoon en ons kinders het almal as kinders saam grootgeword – van babatyd tot getroud wees. Die enigste oorlewende van daardie tyd nog, is ons liewe buurtannie,wat nou al diep in die negentig is.

Hierdie resep het blykbaar sy oorsprong ten tye van Die Tweede Wereldoorlog gehad toe witmeel skaars was, en is oorspronklik met ertappel gebak. Het toe ook bekend gestaan as die Ertappeltert en het n pynappelvulsel bo-op gekry.

Tannie Rosie, soos sy bekend staan het egter die resep aangepas uit ‘n boekie van die destydse
SAVF (Suid Afrikaanse Vroue Federasie) en ons kinders het dit die Omvalkoek gedoop, omdat sodra die skyfie in jou bordjie geplaas is, het dit onmiddellik omgeval.

Ek moes eendag n Rooi fluweelkoek vir iemand bak en was nie gelukkig met die resep wat ek gehad het nie. Toe ek deur die resepteboek blaai wat my eie mammie vir my met die hand geskryf en gegee het toe ek getroud is, het ek weer op die omvalkoek se resep afgekom en besef dat dit eintlik baie goed vergelyk met my resep van die rooi fluweelkoek.

Ek het summier besluit om die kans te vat en wat ‘n treffer. Ek het my gewone roomkaasversiering wat ek altyd gebruik weereens gebruik en ek sal nooit weer n ander resep gebruik as ek n versoek vir ‘n rooi fluweelkoek kry nie. ”

Wenke:
Vries baie goed.
Ekstra 100g sjokolade splinters kan bygevoeg word.
Kakao kan met mielieblom vervang word vir ‘n heerlike klam vanielje weergawe.
Piesang weergawe: Voeg ½ k oor ryp piesang puree by.
Rooi fluweel: 1 bottel Moirs Crimson red
Glutenvrye opsie: vervang met presies dieselfde mates Gluten vrye meel

280 g (2 k) koekmeel
50 g (1/2 k) kakao
5 ml (1 t) bakpoeier
5 ml (1 t) koeksoda
420 g (2 k plus 1 e) strooisuiker
125 ml (1/2 k) kookolie
280 g (325 ml / 1 ¼ k) karringmelk
5 ml vanielje geursel
3 jumbo eiers
½ k fyn, oor ryp piesangs (opsioneel)
Knippie sout

Verhit oond tot 160 C. Smeer twee ronde koekpanne met koekpan smeer, broodpannetjies of 12 gat muffin pan.

Sif die meel, kakao, strooisuiker, bakpoeier, koeksoda en sout 3 keer saam.

Roer die olie, karringmelk, eiers, piesangmoes en vanilla by en klop vir 1 minuut met die K haak indien met staanmenger werk. Anders gebruik ‘n draadklitser vir hierdie doel.

Bak ongeveer 40-60 minute of tot toetspen skoon uit kom vir groot koeke of broodjies…muffins 25-30 min.

Sjokolade ganache
175 g gekapte goeie kwaliteit sjokolade gemaak van kakao botter
100 ml room / Ideal melk (ingedampte melk)
15 ml botter

Plaas room en 15 ml botter in kastrol en pas dit baie goed op terwyl dit tot kookpunt verhit word. Giet die kokende room oor die sjokolade en roer tot glad. Indien die sjokolade nog nie gesmelt het, verhit effens oor dubbel koker.

Giet oor afgekoelde koek…indien jy wil he die versiersel moet mooi paadjies teen die koek afloop…plaas die afgekoelde koek vir 2 ure, bedek in die vrieskas. Jy moet egter baie vinnig werk en giet en klaar kry. Die ganache sal dadelik set.

Bron: Leoni Kraamwinkel verwerk en standardiseer: Annelien Pienaar 2018