Daar is niks so heerlik soos ‘n vars vars vissie gekoop by die hawe as die vissersbote in kom. Seker een van die redes hoekom ek altyd met wegbreek sessies na die kus seker maak ons bespreek by ‘n kampeer plek wat ook naby ‘n hawe is of viswinkel met vars vis.

Ek hou van ʼn kabeljou gevul met heerlike vars kruie, suurlemoen, knoffel en klontjies botter, so ʼn effense Griekse styl met die olywe en ook ekstra olyfolie as vulsel. Saam met hierdie heerlike vis gebraai oor die kole bedien ek skywe bruchetta met knoffel botter gesmeer en oor die kole bruin gebraai. Stukkies vis word dan so vanaf die braaier op die broodjies gepak. Ek weet dit is nou nie baie goeie maniere, maar om dan die sousie so in die foelie van die vis met stukkies brood op te slurp…wel, jy kan net dink die wonderlike geure wat hier uit kom. Al honger? Kom ons begin.

Vir ʼn gesin van 6:
1.5-2 kg kabeljou heel en skoon gemaak. Kop en stert kan nog aan wees.
1 heel suurlemoen, skywe gesny (heerlike wenk: 5 suurlemoen blare vars is ook heerlik om in die vis te pak.
12 olywe, ontpit
12 kersie tamaties, halveer
30 ml balsamiese asyn
60 ml olyf olie
45 ml gesmelte botter of room
2 knoffel toontjies, fyn gedruk
5 takkies tiemie
Katoen tou vir die vasbind van die vis
Sout en peper na smaak

Kole moet gereed wees vir braai! So begin betyds. Maar jy kan hierdie vis ook by 180C in die oond bak vir 20 minute.

Plaas ʼn stuk foelie wat dubbeld gevou is, om skeur te voorkom, op ʼn plat oppervlak. Plaas die gevlekte vis bo-op.

Meng die sous: balsamiese asyn, olyf olie, gesmelte botter/room, fyn knoffel, strook een takkie tiemie af en meng alles saam. Hou eenkant.

Pak die res van die bestanddele in die gevlekte vis. Begin met sout en peper, suurlemoen wieletjies (jy kan hier besluit hoe suur jy wil gaan…), twee takkies tiemie, helfte van olywe en helfte van die tamaties aan beide kante. Druk bestanddele vas en vou die vis toe. Sout die vis aan die buitekante. Giet sous oor. Bind die vis vas met tou sodat die bestanddele binne kan bly as die vis gedraai word. Vou die vis toe in die foelie. Plaas die vis in ʼn toeknyp rooster en rooster 8 min per kant en bedien dadelik.

Bron: www.annelienpienaar.co.za 2022 deur Annelien Pienaar

My kookboeke is hier beskikbaar: Kookboeke