Marmelade rolletjies is heerlik en vertoon pragtig by enige fyn tee tafel met skons, broodjies en vele meer. Dit is egter ʼn tydsame proses om hierdie rolletjies te maak maar die moeite werd. Ek span my stoompot in vir hierdie werkie van skilletjies sag maak en ek het gevind dat met die stoom die ergste bitter van die skil uit kook en die skil heerlik soet is met die kenmerkende sitrus geur.

1 kg sitrus skil (ongeveer 1 sakkie se lemoene)
1.2 kg witsuiker
2 t pektien poeier (Dischem)*
4 k water
2 k lemoensap

Maak seker voor jy begin jou groente messie is baie skerp. Skil die lemoen soos jy ʼn appel sal skil van bo na onder in een baie lang reep. Sny dun genoeg sodat daar ʼn dun lagie wit wys en moenie die string breek nie. Sny elke string in 5 dele.

Plaas die skille in 5 liter water met 1 t sout en 5 e suurlemoensap. Rus vir 1 uur en spoel dan goed af. Hierdie proses sal die bitter help minder maak.

Neem die skille en pak in die stoompot maar moenie die pot te vol maak, maak seker jy vul dit net tot by die maksimum merkie. Voeg 1 koppie water by. Stel op groente en vrugte of vir 10 minute. Die skille moet sag wees na hierdie proses. Indien jy nie ʼn drukkoker het kan die skille gewoon weg sag gekook word. ʼn Vuurhoutjie moet kan deur gaan.

Spoel die skille weer goed af met koue water en rol dan die rolletjies op en steek vas met ʼn tandestokkie.

Berei die stroop deur die suiker met pektien te meng en dan die water en lemoensap saam te meng en eers oor matige hitte, die suiker smelt. Was die kante van die kastrol met ʼn kwassie wat in water gedoop is af. Sodra die suiker opgelos is, kook die stroop vir 1 minuut op hoog en voeg dan die rolletjies by. Kook op matige hitte die rolletjies tot deursigtig of 106C.

Skep die rolletjies versigtig in warm gesteriliseerde flesse en trek die stokkies: tel die stokkies op en neem ʼn vurk om die stokkie te stut en trek dit uit. So val die rolletjie in die bottel sonder om jou vingers te brand. Skuif die rolletjies mooi netjies reg deur dit met ʼn sosatie stokkie in plek te hou. Indien daar stroop kort kan daar net ʼn kwart mengsel van die stroop berei word en die flesse dan so aanvul.

Draai die deksel stewig op. Draai op hul deksel en laat so afkoel.

*Dischem: vra asb by die toonbank dat daar op die sisteem gekyk word. Mense weet nie aldag wat dit is. Hul kan vir jou bestel.

Bron: Annelien Pienaar, www.annelienpienaar.co.za , 2019-08-02
Hoeveelheid: 4-6 x 375 ml botteltjies