As jy die woord Balsamiese asyn noem dan gaan daar liggies vir my op…ek is dol oor Balsamiese asyn en veral van goeie gehalte. Om hierdie sous te maak het ons nodig om die balsamiese asyn vir ʼn wyle te kook sodat dit dikker word en deur ʼn kruie takkie van jou keuse by te voeg trou die geure wonderlik. Hierdie sous kan vir maande in die yskas gestoor word. Kom ons begin.

1 k balsamiese asyn
50 ml treacle suiker
50 ml heuning
15 ml gedroogde knoffel
100 ml olyf olie
50 ml gladde dijon mosterd
kruie keuse: alle takkies moet vars wees: roosmaryn, tiemie, salie
sout en peper na smaak

Sous
Meng die balsamiese asyn, suiker en heuning saam in ʼn kastrol. Kook die mengsel totdat na genoeg ʼn kwart van die vog weg gekook het. Meet deur ʼn tande stokkie of sosatie stokkie in die vloeistof te druk en dan die merkies te maak om te meet. Sodra die sous gereed is, verwyder van hitte en voeg die knoffel en krui van keuse by. Laat baie goed af koel. Sodra afgekoel voeg die olyf olie en dijon mosterd by en klits baie goed deur om te meng en laat eenkant staan.

Groente
1 botterskorsie (butternut), geskil en in blokkies gesny
1 rooi of wit ui in wiggies gesny
4 murgpampoenjies (babymarrow) in wieletjies gesny
1 eiervrug, geskil in blokkies en dan met sout gesprinkel en vir 5 min laat staan, spoel deeglik onder lopende water
2-3  soetrissies van enige kleur, paprika is ook perfek
Basillie kruid vir afronding

Pan braai: Voorverhit ʼn riffel pan en braai groente tot dat dit begin verbruin. Net voor bediening terwyl warm sprinkel met sous en rond af met fyn gekapte neute of sesam saad.

Oond rooster: Skakel die rooster element van die oond aan. Bak dan die groente onder die rooster element tot mooi bruin en gekarameliseer. Voltooi dan soos vir pan gebraai.

Sop: Sodra die oond geroosterde groente uit kom, puree die massa en pas die sout en peper aan na smaak. Giet van die glans sous oor voor bediening en geniet met vars gebakte brood.

Airfyer vriendelik.

Bron: Annelien Pienaar. 2019, www.annelienpienaar.co.za uit Vleis die omvattende kookboek.
Hoeveelheid: 4 porsies