Soms moet mens so bietjie avontuurlustig raak in die kombuis en net kreatief al die basiese beginsels en bakkerspersentasies van fyngebak kombineer en voila! Jou smaak kliere gaan aan die dans en voor jy weet is daar ʼn groot bederf vir jou geliefdes mooi getooi op die tafel. Die koek word met min of geen versiersel bedien omdat dit so heerlik gebalanseerd soet is en klam. Toe ek hierdie resep ontwikkel het, was die gedagte om ʼn oop en sagte struktuur aan ʼn tradisionele Botterkoek te gee, daarmee saam was ek lus vir ʼn klapper geur en ook bietjie neutemeel by vir ekstra vogtigheid. Onthou die olies in die neute en ook die klapper sypel uit as dit verhit word tydens die bakproses en gee vir ons een dekadente heerlike sagte smelt in die mond krummel. Kom ons bak!

Voor verhit oond na 170 C en smeer ʼn ringkoekpan met pansmeer p.12 in die Boerekos met ʼn Twist kookboek. Hierdie resep kan ook heerlike kolwyntjies of muffins mee gebak word. Dit sal ongeveer 12 groot muffins lewer en 2 standaard klein piesangbrood pannetjie grootte. Baktyd vir muffins sal wees25 minute.

5 eierwitte, by kamertemperatuur van ekstra groot tot jumbo eier grootte
½ t kremetart

Klits die eierwitte met die kremetart tot punte vorm. Waarna moet ons kyk om te weet die eierwitte is gereed? Die eierwitte is gereed sodra die menger se spaan se merkies wys in die meringe. Dan stop jy dadelik. Elke menger en handelsmerk werk anders. Vir my neem dit met my Kenwood klein twee vlerk handmenger 1 minuut, met die staan Kitchenaid 30 sekondes…maar die belangrike ding hier is om BY jou menger te staan vir hierdie stap. Eierwitte wat te styf geklits word is jou grootste vyand tov struktuur probleme. Hou eenkant.

400 g (2 k) witsuiker
250 g (1 k plus 2 e) botter by kamertemperatuur *bakkersmargarien met ʼn 80% vetinhoud moet gebruik word.
5 eiergele van ekstra groot of jumbo eiers
5 ml vanielje of karamel geursel

Klits die suiker en botter eers met stadige spoed totdat die botter en suiker goed gemeng het vir 2 minute om te voorkom dat die botter uit die bak skiet. Verhoog die spoed van die menger en verroom vir 5-8 minute op matige spoed. Hier is ʼn wenk: Kenwood kan julle die menger tot op 5-6 draai, maar maak seker die menger waggel nie, die menger moet sekuur werk. Vir Kitchenaid tot en met 10-14 vir die Heavy duty mengers. Sodra die mengsel mooi lig is voeg al die eiergele by en klits weer goed deur vir ongeveer 3 minute tot weer lig en donsig.

Voeg die geursel by en klits weer goed deur.

1 k karringmelk / kefir / plain yoghurt
2.5 ml (1/2 t)koeksoda
10 ml (2 t) bakpoeier
280 g (2 k) koekmeel
15 ml (2 e) kaneel
5 ml (1 t) gemmerpoeier
2.5 ml (1/2 t) neutmuskaat
60 g (1 k) fyn klapper
100 g (1 k) pekans fyn gekap, amper so fyn soos pekan meel maar nog hier en daar ʼn growwigheid
3 knippies sout

Sif die koekmeel, bakpoeier, koeksoda, kaneel, gemmer, neutmuskaat en sout saam. Roer die klapper en neute by die meel mengsel, hou eenkant.

Meng die karringmelk by die verroomde eier en suiker mengsel en roer goed deur.

Meng die meelmengsel by en roer goed deur met ʼn deegskraper. Vou die eierwitte in en skep in voorbereide panne.

Bak die koek vir 35 tot 40 minute tot gaar.

Laat die koek vir 10 minute in die panne afkoel voordat dit op n koekbord ontvorm word.

Bedien met die Roomkaas versiersel in die BKT kookboek by Mev Dominee se wortelkoek of die Mascarpone versiersel.

Bron: www.annelienpienaar.co.za deur Annelien Pienaar, 2020
Hoeveelheid: 1 groot ringkoek, 12 kolwyntjies of 2 piesangbroodjie grootte broodjies.