Photo by: Annelien Pienaar Food Consultant (www.annelienpienaar.co.za)

Karameljellie laag met ‘n broskorsie van gekapte, geroosterde pekanneute is nooit te versmaai in die Pienaarhuishouding. Binne ‘n kits het die Filistyne die bak sy bodem laat sien.

Kors
140 g koekmeel
115 g botter
knippie sout
4-5 e water

Plaas in voedselverwerker al die bestanddele behalwe water. Draai lem totdat die botter egalig ingewerk is. Voeg die water by en draai die lem weer totdat die mengsel deur gewerk is. Haal die deeg uit en druk liggies aanmekaar. Rus 30 minute.

Smeer ‘n glas of keramiek pasteibak en rol die deeg 3 mm dik uit en voer ‘n 20 cm tertbak uit. Laat die deeg in die kante van die pasteibak in sak, moenie indruk nie. Sny met ‘n afwaartse beweging die oortollige deeg van die rant af.

Hou in yskas totdat vulsel gereed is.

Vulsel
250 ml goue stroop
1/2 k sagte bruinsuiker in die koppie ingedruk (treacle sugar)
1/4 t sout
5 ml vanielje geursel
15 ml suurlemoensap
2 e mielieblom met 50 ml water aangemaak
1 1/2 k pekans, grof gekap
3 eiers
Styf geklopte room vir versiering

Meng al die bestanddele saam en skep in tertkors. Bak vir 60 minute by 170 C tot gestol.

Laat baie goed afkoel en plaas in yskas om volledig te set.

Bedien met skeppies room.

Hierdie tert vries goed en verdubbel perfek. Die kors moenie verdubbel word nie, dit is genoeg om ‘n dubbele vulsel te hanteer.

Bron: Annelien Pienaar, 2018
Hoeveelheid: 1 x 20 cm tert foilbak grootte as ek ‘n aanduiding so kan gee.