Een van my moeder se fynste gebak wat sy kon maak. Die gaste kon nooit genoeg gekry het van hierdie soete verleiding. Moeder het sommer bakke volgemaak en dan gevries en uitgehaal soos nodig. Die brosheid van hierdie fyngebak gaan nooit verlore met die vries nie. Geniet.

500 g Fillo deeg
100 g (1 k) amandels gemaal
400-500 g (4-5 k) amandels of pekans grof gekap
100 g (1 k) pistasie neute gekap
300 g (1½ k) strooisuiker
5 mℓ (1 t) kardamom, gemaal
345 g (1½ k) botter

Stroop
400 g (200 g) witsuiker
500 ml water
125 ml heuning
30 ml suurlemoensap
15 ml rooswater

Meng al die neute, behalwe fyn amandels, suiker met die kardamom saam.

Smeer ‘n 36x27xm bak met gesmelte botter uit.

Sny die deeg in die grootte van die pan. Hou die deeg sag deur dit op ‘n koekroller te rol en dan met ‘n klam doek toe te maak.

Pak nou eers ‘n laag filo deeg teen die kante van die bak asook die basis. Gebruik die afval stukkies vir hierdie deel. Pak dit in twee lae. Sprinkel nou die neute mengsel eweredig oor en plaas weer twee velle filo deeg op die neute, hou so aan totdat die lagies voltooi is met ‘n laaste dubbellaag filo.

Sny nou die filo met ‘n skerp mes direk in die bak in die vormpies wat jy wil hê, dit kan in diamantvorm, vierkantig of reghoekig gesny word.

OF

Sny die deeg in lang repies van ongeveer 4-5cm breed en 25cm lank. Skep van die vulsel oor en rol op. Gaan aan met stap 6.

In ‘n dun straaltjie laat die gesmelte botter oor die deeg loop. Bak die deeg by 160℃ vir 60 minute tot 90 minute. Die deeg moet goudbruin wees voordat dit uitgehaal word.

Maak dan die stroop terwyl jy die laaste 10 minute wag. Kook die water en die suiker saam, totdat dit ‘n stoop word oor hoë hitte. Voeg die stroop of heuning by asook die suurlemoensap. Laat weer opkook en haal van hitte af. Sodra die mengsel afgekoel het tot lou, voeg die rooswater by. Laat goed afkoel. Voeg die koue stroop oor die warm deeg en laat dit vir ‘n dag staan om goed in te trek. Sprinkel met fyn amandels.

Bron: Annelien Pienaar, www.bosenbergguestfarm.co.za, 2016, fyngebak klas.
Hoeveelheid: Ongeveer 50 stukkies as jy mooi sny