Eureka Mills Brood varkie

Eureka Mills Brood varkie

Die konsep van brood varkies is heel eenvoudig en tog so slim uitgedink. Terwyl jy braai of potjie maak kan die varkie warm word en ‘n broodjie gebak word. Die standaard Brood varkies van Eureka Mills neem panne van tussen 19-30 cm in lengte en 7-10 cm in hoogte. Hierdie lewer dus ’n heerlike groot familie brood. Om verder die konsep van ’n Brood varkie te verduidelik kan mens so vêr gaan om groente-, aartappel- en pap terte hierin te bak. Die hitte in die wande van die varkie word eweredig van bo en onder versprei wat dus egalige bak tot gevolg het. Maak asb. seker jy lees eers sorgvuldig deur die teks om die voorbereiding en gebruik van die varkie te verstaan. Mag jy sommer heerlik bak met Eureka se wonderlike produkte. Dink net vir ons kampeerders watter heerlike kampkos kan jy maak…ja, ek het selfs al Roly-poly en Malva poeding in haar gebak! Geniet!

PS: Brood varkies kan aanlyn by Eureka Mills bestel word en hul lewer landwyd af. www.eurekamills.co.za

1 kg (7 k) koekmeel, steen gemaal, Eureka Mills
10 ml (2 t) sout
10ml (2 t) witsuiker
1 Kitsgis, sakkie (14 g)
50 ml (4e) olyfolie
50 ml (4e) melk, lou warm
600 mℓ water by kamertemperatuur

Voorbereiding van Brood varkie:
Neem kole wat reeds gloeiend is en plaas ongeveer 3 kole weerskante bo-op die varkie en dan ook 3 kole onder die varkie weerskante. Doen hierdie ongeveer 30 minute voordat jy gaan bak.

Onthou om ysblokkies en ook waterbottel met spuit byderhand te hou om die varkie effens af te koel en stoom vir die brood te genereer.

Voorbereiding van deeg:
Los die gis en suiker in 250 ml sterk water op en laat staan 5 minute totdat skuim vorm. So weet jy ook dat die gis goed is.

Sif meel en sout saam en meng goed. Vryf die olyfolie in die meel in totdat dit nie meer sigbaar is.

Voeg nou die oorblywende water en melk by meel mengsel en knie vir 10 minute of todat die deeg los kom van jou hande en die kante van die skottel

Laat deeg rus en rys tot dubbel die volume, ongeveer 30 minute. Knie af. Verdeel deeg en maak op vir lang brode. Ek rol deeg effens langwerpig uit om die lengte van die pan te kry. Rol dan op en sit met naat na onder in die pan en los om dubbel die volume weer te rys.

Plaas 3 ysblokkies in die brood varkie, sit pan in en maak toe, na 15 minute maak weer oop en spuit die brood met water en maak weer toe. Bak nog 15 minute en haal uit om af te koel.

Bron: Annelien Pienaar, 2016, kampkos klas
Hoeveelheid: 2 brode van 19cm

 

Print Friendly, PDF & Email
2017-06-16T12:37:44+00:00 4 Comments

4 Comments

  1. Annatjie Mc Callum June 18, 2017 at 4:15 am - Reply

    Sjoe Annelien. Baie danqi dat jy jou kennis só met ons deel. Jou verduidelikkings van die resepte en metodes gee jy so eenvoudig aan ons deur dat ons nie anders kan as om bo baas kokke te word nie.

    • Annelien June 19, 2017 at 5:08 am - Reply

      Hallo Annatjie McCallum. Dankei dat jy die waarde van die resep met ‘n les waardeer en verstaan. Groete Annelien

  2. Lappies June 26, 2017 at 7:27 pm - Reply

    Ek het al baie potbrode op kole gebak en het vandag my eerste een in die elektriese-oond probeer, maar die Broodgodin was my nie goedgesind nie. Net toe ek die oond oopmaak om my pan in te sit, gaan die krag af. Nou my vrae:
    1) Kan ek die deeg steeds gebruik? Ek het dit weer afgeknie en in die vrieskas gesit.
    2) Ek het nog altyd kitsgis gebruik maar het ‘n homp gis by ‘n plaaslike bakkery gekry. Is dit maar net die massaproduk van die koekiesuurdeeg wat mens kry?
    3) Indien die suurdeeg in 2) genoem, iets anders is, hoeveel gebruik ek daarvan op ‘n 1kg meel en hoe lank kan ek die suurdeeg in die ys-/vrieskas bêre?
    4) My vrou is onder andere allergies vir gluten. Sal die klipgemaalde meel ‘n beter opsie wees? (Jammer oor die ‘mediese’ vraag, maar daar is sekerlik minder dokters wat brood bak as wat daar baksters is wat met die goed in aanraking kom.)
    5) Die broodpan wat ek gebruik is nie die gewone (bekende) sink broodpan nie. Dit is ‘n gietyster pan. Is daar enigiets waarvoor ek moet oplet as ek dit in die elektriese oond gebruik?
    6) Ek het nou onlangs eers gehoor dat mens ‘n houer met kookwater in die oond moet/kan sit. Hoeveel water moet dit wees? Die water gaan mos woes begin kook op ‘n stadium.

    Dankie by voorbaat.

    • Annelien June 26, 2017 at 7:54 pm - Reply

      1. Jy kan die deeg net af knie en in geoliede bak in die yskas hou vir die volgende dag en weer vorm.
      2. Ja dit is korrek dit is bakkers gis en dit is net grootmaat.
      3. Lees gerus my artikel op die webtuiste oor gis vs suurdeeg waar ek ‘n volledige verduideliking vir die verskillende gis se doserings gee.
      4. Waar woon jy Lappies? Ek bied klasse aan oor hierdie storie van gluten allergiee. Die ding staan so… Winkel brood is groot gif agv die bymiddels wat inkom. Dit is dan eerder ‘n gluten sensitiwiteit as allergie tensy dit 100% met bloedtoetse en ander bevestig is. My opinie en navorsing toon dat baie minder mense allergie sal toon as hul steengemaal gebruik en weer na suurdeeg (nie gis) oor beweeg. Soos ouma nog gebak het. Ek bied hierdie jaar reg deur SA Klas aan. Kyk of jy of sy kan bywoon. Die klas is op ‘n akedemiese fondasie gebasseer en julle koppe draai as ek klaar is.
      5. Ek sal anders om werk. Ek sal die pan eerder vooraf in die oond warm maak as die oond verhit. DAn die brood deeg in mandjie rys en dan uitkeer in die pan om daarin te bak. Ons noem dit Dutch oven baking. Hierdie praktyk word in die klas gedoen.
      6. Hierdie word ook in die klas hanteer. Die stoom in die oond is om vir die eerste 10 minute te voorkom dat daar ‘n korsie vorm wat sal keer dat die brood nie mooi hoog rys en goeie tekstuur lewer aan die binne kant. Dit is ook een van die klas aspekte wat hanteer word.

      Kyk asb of julle vir klas kan kom anders koop my Boerekos met ‘n Twist kookboek sodat jy daar ook beter raad kan kry. Daar bespreek ek alles in volledige detail.

      Groete Annelien

Leave A Comment