Sommer ‘n eenvoudige, flop vrye Vrugtekoek resep!

Voorbereiding van vrugte
1 kg Gemengde koekvrugte
2 k Suiker
2 k Glanskersies – gesny
250 g Botter – Rama of Stork bake is ook geskik
1 k Water
1 k Rooibostee
1/4 k Brandewyn (sonder alkohol: appelsap of rooibos tee)

Metode
1. Kook bo genoemde bestanddele alles saam vir 5 minute.

2. Laat die mengsel tot lou warm afkoel. Hierdie mengsel kan ook ‘n dag voor die tyd berei word en gebruik word soos tyd toelaat.

Koekbeslag
4 k Koekmeel
2 t Koeksoda
2 t fyn Gemmer
2 t Suurlemoensap
4 Eiers – goed geklits
knippie Sout

Metode
1. Voeg koeksoda by vrugtemengsel en meng goed.

2. Sif die koekmeel, sout en gemmer saam, meng nou die meelmengsel en geklitste eiers om die beurt in die vrugtemengsel in.

3. Voeg suurlemoensap by, meng goed met houtlepel. Skep in diep pan wat se kante en bodem met waspapier uitgevoer is.

4. Bak in vooraf verhitte oond by 180 ˚C. Ek het ‘n 23 cm deursnit ronde koekpan gebruik. Wanneer koek in oond gesit word stel af na 140 ˚C. Sit 2 lae waspapier bo op koekpan en haal dit na 2 ure af. As koek in vlakker groot pan bak kan dit dalk net 3 ure bak. As koek na 3½ ure nog nie gaar is nie is daar fout.

5. As koek uit oond kom keer uit op afkoel rak. Gooi goeie gehalte brandewyn oor.Laat heeltemal koud word. Draai toe in foelie en sit in blik. Gooi 1 x per week nog brandewyn oor om klam te hou en draai weer foelie om.

6. Kan na ‘n week begin eet. Hoe ouer die koek word hoe meer ontwikkel die geure. Bak ten minste 8 weke voor die tyd die koek. Die koek kan op die rak, goed toegedraai in foelie vir maande bewaar word by ‘n konstante temperatuur.

Annelien se opmerking
Die koek is heerlik klam. Ek gebuik Sjerrie of Jerepico in plaas van brandewyn vir daardie ekstra soet smaak, maar dan gaan die koek nie solank hou nie. Brandewyn is die beste preseveer middel omdat die alkhol inhoud so hoog is. Dit is ‘n wonderlike koek en die moeite werd om te maak.

Kortpad: ja daar is kortpaaie vir vrugtekoeke bak en deur die vrugte in die eerste fase vir ‘n paar dae te marineer en goed bedek te hou, sal die rypmaak verkort na net 1 week. Dus, vir die voeding skema gebruik ek OBS en elke tweede dag vir 8 dae voer ek die koek en draai ook die koek as ek dit doen. So jy kan ‘n week voor Kersfees nog weg kom met ‘n Vrugtekoek bak!

Ek vra baie mooi, my resepte is my werk, dit neem baie ure om vir julle flop vrye resepte te ontwikkel. Daarom share altyd die resepte met die link na my site. MOENIE my werk copy en paste en op groepe deel. Vir ons as conent creators help die verkeer na ons sites om ons deur oop te hou. Hierdie resep deel ek met jou om die Gees van Welwillendheid te ervaar. Doen die regte ding en share links. Baie dankie vir die volg en die afgelope jaar saam met elke leser. Mooiste wense vir die Feestyd. 

Groete Annelien Pienaar

Bron: www.annelienpienaar.co.za 1996, deur Annelien Pienaar

Hoeveelheid: 1 vrugtekoek