Die oorsprong van hierdie resep lê in die markdorpie Melton Mowbray in Engeland, waar die wêreldbekende varkpastei reeds sedert die 18de eeu gebak word. Die Engelse het 'n groot invloed op ons eie koskultuur gehad, en soos met soveel resepte het Suid-Afrikaanse kokke deur die jare hul eie stempel daarop afgedruk. Die geheim van hierdie pastei lê in die warmwaterdeeg – 'n unieke deeg wat met warm vet voorberei word en sterk genoeg is om sy eie vorm te behou sonder 'n bakvorm. Tradisioneel word uitgekookte bees-, skaap- of varkvet gebruik, maar goeie gehalte ghee lewer ook uitstekende resultate.