Ek geniet dit om nuwe maniere te ontdek om mieliemeel in my resepte te gebruik. Hierdie brood het oor die jare een van ons gunsteling kampresepte geword, maar dit is net so welkom op die kombuistafel by die huis. Die kombinasie van roommielies, heelpitmielies en mieliemeel sorg vir 'n sagte, klam brood met 'n heerlike mieliegeur, terwyl die kaas en spek dit omskep in 'n volledige ete. Dis 'n resep wat maklik aangepas kan word met die bestanddele wat reeds in jou yskas beskikbaar is.