Mielierys is vir my 'n stapelbestanddeel wat byna elke week op my spyskaart verskyn. Ek kook dit dikwels soos gewone rys, maar gebruik dit ook graag in slaaie, soppe en oondgeregte. Hierdie resep wys hoe maklik oorskiet mielierys in 'n heerlike maaltyd omskep kan word. Omdat die mielierys nie vooraf afgespoel word nie, behou dit sy natuurlike stysel, wat saam met die melk en kaas 'n besonder romerige tekstuur vorm. Dis eenvoudige boerekos met 'n moderne aanslag.