Die geheim van mooi kersiekonfyt begin by goeie vrugte. Kies kersies wat vars, ferm en mooi uitgeswel is – verlepte of verrimpelde bessies hoort nie in hierdie pot nie. Die kersies word vooraf in koeksodawater geweek, afgespoel en daarna ontpit. Die resep werk op ’n eenvoudige verhouding van kersies, suiker en water, met ’n klein bietjie pektien en suur vir die perfekte set. Die gin word heel aan die einde bygevoeg sodat die geur behoue bly. Gee die konfyt daarna ’n paar dae kans om behoorlik te ontwikkel voordat jy dit begin geniet.