Hierdie is ’n brood wat ek juis ontwikkel het vir mense wat graag vars brood wil bak, maar nie altyd ure in die kombuis kan deurbring nie. Ek het die proses in drie fases verdeel sodat jy die werk maklik rondom jou dag kan beplan. Die lang, stadige fermentasie gee die brood ’n heerlike geur en sagte krummel, terwyl die deeg ook gebruik kan word vir vetkoek, roosterkoek, potbrood, bolletjies en rolletjies. Die deeg kan vir tot drie dae in die yskas gehou word en die gebakte brood kan in skywe gesny en gevries word. Sodra jy hierdie metode onder die knie het, sal vars brood bak sommer deel van jou gewone roetine word.