My lewe in die kombuis draai om kruie en speserye. Vir my is dit nie net geurmiddels nie, maar die boustene van elke gereg. Wanneer mens verstaan hoe speserye werk en hoe om hul natuurlike olies te ontsluit, ontdek jy 'n wêreld van geure wat nie uit 'n botteltjie gekoop kan word nie. Hierdie Berbere-speserymengsel is een van my gunstelinge. Alhoewel dit sy oorsprong in Ethiopië het, het ek dit aangepas om bestanddele te gebruik wat maklik in Suid-Afrika beskikbaar is. Die resultaat is 'n veelsydige speserymengsel wat ewe tuis is op vleis, vis, groente en selfs in gebak of hartige pasteie.