BKT toetskombuis klets!

Hallo Twisters,

Wat ’n woelige week was dit nie. Vol emosie en verrassings. My buurman breek sy nek en is nou ’n kwadrupleeg…ek gaan hard moet werk om my kop om hierdie een te kry. Hy was ’n ongelooflike besige mens…altyd rooimiere gehad en ’n “adrenalien junkie” gewees. Van Gaalen kaasplaas gaan vir ’n rukkie sonder hom moet funksioneer sodat hy deur sy rehabilitasie kan gaan. Goeie nuus is egter die feit dat hy sy arms kan beweeg. Hande en bene nog geen gevoel…maar ons vestig ons hoop op ’n Hoër Hand.

Dan kan julle ook loer ek het die winkeltjie gedeelte opgerig op die webtuiste vir boek bestellings, klasse en boek gesprekke deur die land. Die Pretorianers kan volgende week begin bespreek vir my boeke kuiertjie by Taste Cafe in Rietondale. Ek sal die skakel ook op sosiale media deel. Ons gaan heerlik proe aan disse uit die BKT kookboek en dan diegene wat reeds boeke het se boeke teken, daar sal ook boeke beskikbaar wees. Verder gaan ek die boek met julle bespreek en vrae van julle kant hanteer en sommer net heerlik met ieder en elk kuier. Bloemfontein, Kaapstad en Machaddodorp se datums is teen volgende week ook bevestig. Dan skop daar ook ‘n BKT kookboek kompetisie af vir my lesers. Volg ook op sosiale media en volgende week se nuusbrief. Lekker pryse en nog boeke om te wen.

Verder is daar nie tyd vir sit en hartseer wees nie, ons moet werk. Daar was ’n navraag gewees in die newsfeeds oor hoe om aartappels te vries en weer heerlik bros te kry. Mens het gevra hoekom is aartappels gevaarlik as dit in die yskas gehou word. Hierdie is nou een lang antwoord maar tog baie, baie belangrik om te weet…kom ons begin in afdelings die vraag hanteer:

1. Die rou aartappel: mag nooit in die yskas geplaas word nie. Die aartappel bevat suikers (stysel) en aminosure (proteïene). Wanneer rou aartappels in die yskas gestoor word verhoog die suikers in die aartappels en daar vind dan tydens die kookproses ’n chemiese reaksie plaas tussen die suikers en aminosure. Hierdie reaksie het tot gevolg dat kanker vormende partikels, (karsinogenes) of te wel acrylamides (amper soos plastiek) gevorm word (Ps. hierdie is wêreldwyd ’n sensitiewe onderwerp en studies tans besig om dit wetenskaplik te toets en bewys). Jy sal vind so ’n aartappel sal soeter wees en ook dan baie donkerder braai as normaal, maar sal jou baie siek maak. Dus stoor die aartappels weg van lig in ’n droë kas.

2. Gaar aartappel: kan met die grootste gemak in die yskas gestoor word vir ’n periode van 7 dae. Daarna sal dit slymerig word (die proteïene) is besig om te ontbind en daarom dat ’n aartappel regtig onaangenaam ruik as dit vrot word. Dit is een teken dat jy baie, baie siek kan word. Gaar aartappel is ook geskik om gevries te word maar dan moet julle die praktyke soos in die Brosgebraaide aartappel resep volg. Sterk soutwater kook, yskoue water afkoel, droog drup en vries. Hierdie is gesonde en veilige praktyke.

3. Gebottelde aartappelslaai: so het ek verlede jaar die artikel op die web geskryf oor preservering en ook higiëne sodat julle weet watter bestanddele veilig is om te preserveer onder normale omstandighede tuis. Aartappelslaai en pasta kan onder geen omstandighede met gewone kook tegnieke gebottel en verkoop word nie. Ja, jy kan dit doen maar dan moet dit in die yskas gestoor word. Soos reeds verduidelik bevat aartappel proteïene en mense kan a.g.v. dit doodgaan. Clostridium Botulinum of te wel Botulisme is die “silent killer” van voedselvergiftiging. Vroue wat swanger is, mag onder GEEN omstandighede hierdie produkte wat gebottel is inneem nie. Botulisme sal premature kraam aanbring of selfs die fetus aanval en laat doodgaan. Wees gewaarsku as dinge te goed is om waar te wees. Botulisme kan dus nie met gewone kook temperature gedood word nie, maar net met stoom drukkokers soos in die geval van canners wat 120℃ en hoër bereik wat patogene mikrobes vernietig.

Hierdie naweek bak ek klaar aan die wonderlike Papawersaad kolwyntjie resep van Leana Smit en dan gee ek ook aandag aan paar mikrogolf beskuit resepte wat ek ontvang het van twee ander lesers. Die aartappel pannekoek is in wording en sal ook teen volgende week die lig sien.

Mag dit ’n geseënde naweek vir ieder en elk wees. Laai jul batterye vir ’n besige week wat wag saam met my en die ervaringe in die BKT toetskombuis!

BKT toetskombuis groete Annelien