Peppermentcrisp tert

Peppermentcrisp tert

My Ma het maar net ‘n hand met terte gehad. Een daarvan was ‘n Peperment crisp tert! Ek en my sussie is in dieselfde jaar gebore en ons is vir 2 maande saam ewe oud. My sussie verjaar die 26ste. Desember en glo my, ons vier behoorlik fees. Ek onthou hoe dit altyd ‘n instelling was van my Ma om hierdie lekker tert van haar te maak wanneer dit my sussie se verjaardag was. Ons het nooit deur die jaar hierdie tert gekry nie, net op Maryke se verjaardag!

My Ma het altyd bietjie gelatien by die room geklits sodat dit stabiel kan bly as dit by tye buite moet staan. Omdat sy kanker gehad het, het sy ons vermaan om van kunsmatige room af weg te bly, daarom dat die resep regte room bevat. Verder as die room gestabiliseer is, kan dit in rosies gespuit en bevries word. Later haal jy dit uit om op koffie, mousse, koeke en vele meer te bedien sonder dat dit pap sal word. Sy was darem maar so ‘n slim en fyn vroutjie!

1 t Gelatien gesprinkel oor 50 ml water en vir 5 minute gelos
500 ml Vars room – nie die lang lewe soort nie (ek gebruik geen kunsmatige room)
2 blikkies Karamel treat
4 Pepperment crisps – gerasper
2 pakkies Tennisbeskuitjies

Smelt die gelatien deur dit of in ‘n bakkie kook water te sit of baie versigtig in die mikrogolf oond.

Klits dan die room tot effens styf en begin om die gelatien in ‘n dunstraaltjie by te klop.
Hou aan klop totdat die room lekker styf is en jy die klitser se merke sien bly in die room.
Onthou as jy te lank klits gaan jy botter maak!

Meng nou die karamel treat by die room asook ¾ van die sjokolade.

Pak koekies in ‘n tertbak uit en skep van die mengsel oor totdat die bak halfpad vol is.
Pak dan nog ‘n laag koekies en maak die res van die bak vol met die room mengsel.

Sprinkel die oorblywende sjokolade bo oor en laat dit in die yskas om te set.

BRON: Hantie Bezuidenhout, Annelien Pienaar. 2015, www.bosenbergguesfarm.co.za
Hoeveelheid: 8 porsies

 

Print Friendly, PDF & Email
2017-07-09T12:16:56+00:00 0 Comments

Leave A Comment