Hollandaise sous

Hollandaise sous

Hollandaise sous is vir menige tuiskok soms ’n tranetrekker, maar as jy die beginsels reg toepas sal jy gou-gou agter die kap van die byl kom. Dit is belangrik om met ‘n dubbel koker sisteem te werk sodat die eier nie skif nie. Die water in die onderste kastrol moet liggies kook met ’n sagte stoom. Die boonste bak mag nie aan die kokende water raak nie. Onthou dat stoom warmer is as kookwater en dus die bak in die dubbelkoker vinnig sal verhit, as die bak aan die water raak, sal jy in alle ewigheid bly roer. Dus, maak seker jy verstaan hoe ‘n dubbelkoker sisteem werk.

Bedien saam met eier geregte vir ontbyt, aspersies is heerlik met hierdie sousie en sommer net so as doopsousie vir aartappel wiggies. Die suur in die sous is absoluut verslawend. Geniet!

200 g botter
2 groot eiergele (hou by voorgeskrewe grootte)
15 mℓ (1 e ) wit wynasyn
15 mℓ (1e ) wit wyn
30 mℓ (2 e) water
Grof gemaalde swart peper na smaak
30-45 mℓ (2-3 e) lemmetjie sap, na smaak

Smelt die botter oor lae hitte en skep die skuim af (verhelder die botter) en hou warm eenkant.

Kook die water, asyn en wyn saam totdat daar net ‘n eetlepel vog oor is. Dit kan sommer in die mikrogolf gedoen word, anders, stoof. Laat eers afkoel.

Plaas die eiergele en verminderde witwyn mengsel in kleinerige dubbelkoker oor matige hitte terwyl die water kook. Hou aan klits met draadklitser totdat die eiergele liggeel en romerig is.

Voeg ongeveer ‘n eetlepel se hoeveelheid botter by die eier en klits goed deur. Hou so aan met elke hompie botter totdat dit ingewerk is. Geur dan die sous en gooi deur siffie om glad te kry. Voeg die suurlemoensap by en roer goed deur.

Die sous moet mooi liggeel wees met ’n definitiewe glans.

Bron: Annelien Pienaar, 2017
Hoeveelheid: 4 porsies

Foto: superfoods

 

Print Friendly, PDF & Email
2017-06-14T14:45:25+00:00 0 Comments

Leave A Comment