Tadisionele Suikerbrood

Tadisionele Suikerbrood

Die resep is so oud soos die berge en gevind in een van Mev. Tulleken se boeke. Die koek is ’n tegniese resep wat sonder enige rysmiddel gebak word. In die ou dae het Mev. Tulleken aanbeveel dat die meel twee keer gesif word en die suiker fyner gemaal word om ‘n fyn tekstuur in die gebak te verkry. Die kenmerk van hierdie koek is ’n bros korsie aan die buitekant, strooi tot goudkleurig. Die binnekant fyn tekstuur en lig. Die smaak is effens neutraal maar kan gegeur word indien verkies.

6 groot eiers geskei (maak seker die eiers is nie jumbo want dan is dit 5 eiers)
160 g (¾ k) strooisuiker
5 mℓ kremetart of 15 mℓ suurlemoensap, vars
140 g (1 k) koekmeel
Knippie sout

Voer die boom van ’n ronde- of langwerpige- of tuit pan met 23cm afmeting, uit met waspapier en moenie smeer nie. Voorverhit oond na 160℃.

Skei die eiers en klits die eierwitte tot sagte punt maar styf met die kremetart. Voeg dan 100 g van die strooisuiker by en hou aan klits tot glansend.

Klits die eiergele met dieselfde vuil spatels tot liggeel vir ongeveer 5 minute. Voeg dan die res van die strooisuiker versigtig bietjie, vir bietjie by terwyl jy bly klits en die mengsel lig en romerig word. Die strooisuiker moet opgelos wees voordat jy aangaan.

Vou die eiergeel mengsel met ‘n draadklitser by die eierwitte in met ‘n figuur 8 beweging.

Sif die koekmeel en sout saam en sif dan in 4 lae die meel oor die mengsel en vou in na elke sif aksie. Skep in panne en skud net een maal om lug borrels uit te kry. Indien jy te veel en te hard skud, breek die gluten en eier raamwerk en die koek gaan binne ‘n swak tekstuur en amper toegeslaan wees.

Bak die koek vir 60 minute totdat toetspen skoon uitkom.

Versier met vars bessies en room.

Bron: Annelien Pienaar se verwerking van Mev. Tulleken se suikerbrood.

Hoeveelheid: 1 x 23cm koek

 

Print Friendly, PDF & Email
2017-06-13T13:24:28+00:00 0 Comments

Leave A Comment