Waenhuis koek

Waenhuis koek

Hierdie koek is eintlik ‘n Amerikaanse resep wat ek jare gelede teëgekom het genaamd: Chocolate Brownie Moccha cake en die kloutjie by die oor gekry. Iemand het my vertel van die Waenhuis koek wat hulle in Heidelberg area geëet het. Met navorsing en baie vrae was hierdie dekadente koek die uitvloeisel van daardie resep. Die koekbeslag word gemaak en in ‘n koekpan geskep, daarna word die meringue bo-op die rou beslag geskep en die twee lae word dan so gebak. Ja, ek weet dit klink snaaks maar dit is hoe die koek gebak word.

Die oorspronklike resep het ’n sjokoladekoek basis, maar die ene van Heidelberg was ’n vanieljekoek resep gewees. Daarom gaan ek vir julle die opsie in hierdie resep gee om die koek basis in sjokolade of vanielje te bak. Omdat daar room op die meringue geskep word sodra die koek goed verkoel het, kan die room tot gevolg hê dat die meringue smelt. Daarom het ek het die resep gestabiliseer sodat die room gedeelte met gelatien verstewig word en dit nie die meringue gedeelte pap maak nie. Hierdie resep het bietjie ontwikkel werk gehad en ek dink met hierdie kinkel met die gelatien wat ek ingebring het, kan die koek 7 dae in die yskas hou…maar dit is so lekker dit sal binne dag 1 op wees! Ek dink die naam Waenhuis koek…verwys seker na ‘n wavrag tegnieke om die outjie te maak. Ek sal hom verseker weer maak.

1 k droë broodkrummels
130 g (½ k) sagte botter
100 g (½ k) witsuiker
4 eiergele
140 g (1 k) koekmeel
10 mℓ (2 t) bakpoeier
Knippie sout
125 mℓ (½ k) melk
100 g (½ k) okkerneute of pekans, gekap

*omskakeling na sjokolade koek: 4 e kakao met 50 mℓ kookwater aangemaak. Klits saam met melk in. Onthou om 2e koekmeel uit die resep te haal.

Voorverhit oond na 170 ℃ sonder thermofan, indien jou oond se thermofan nie kan af nie, bak die koek dan eerder by 150 ℃ vir 45 – 60 minute. Smeer twee koekpanne met ’n deursnit van 20-24 cm en sprinkel met broodkrummels, plaas eenkant. Ek het in hierdie foto die pan se wande met waspapier uitgevoer sodat die kante mooi vertoon as dit koek aanmekaar gesit word. (die kante is ook met broodkrummels uitgevoer…die koekpan smeer op die webtuiste is perfek om die krummels in plek te hou.)

Sif koekmeel, bakpoeier en sout saam.

Room die botter en suiker saam vir 5 minute totdat dit lig en romerig is. Voeg die eiergele een vir een by en klits baie goed na elke byvoeging.

Voeg die melk (en of die aangemaakte kakao) en koekmeel mengsel by die eiergele en meng goed deur. Skep die mengsel in die voorbereide panne en sprinkel die neute oor die twee panne.

Meringue laag
4 eierwitte
5 mℓ (1 t) kremetart
200 g (1 k) witsuiker

Klits die eierwitte en kremetart saam tot sagte punt stadium. Voeg die witsuiker lepel vir lepel by en hou aan klits totdat al die suiker ingewerk is en die meringue ‘n silwerglans verkry.

Skep die meringue op die koeklae en versprei eweredig.

Bak die koek vir 25-30 minute totdat die meringue bruin en geset is.

Laat die koek baie goed afkoel. Ontvorm versigtig en plaas in die yskas vir 2 ure. Hierdie stappie help die room om dadelik te set en nie die meringue te affekteer nie.

Roomvulsel
Hier kan julle met die geur van die roomvulsel speel. Ek het 1 t koffie poeier met 1e kookwater gemeng vir die mocha deel. Maar jy kan geur soos dit jou pas…vrugte geure soos rooswater vir bessie vulsels, of wat van klapper geursel…aarbei, piesang…Ek los die geure by julle.

Vir die sjokolade koek kan jy natuurlik ons ou vriend die Karamel blikkie saamsleep en ‘n halwe blikkie in die mengsel insit!

250 mℓ (1 k) room (yskoud…soos in yskoud)
5 mℓ (1 t) geursel van keuse
60 mℓ (4 e)witsuiker
1 e gelatien poeier opgelos in 50 mℓ kookwater

Los die gelatien poeier in die kookwater op en roer sodat die mengsel soos stroop lyk, geen stukkies sigbaar. Verhit eerder deur die gelatien bakkie in kookwater te plaas.

Voeg geurmiddel en witsuiker by die room en klits, terwyl jy klits voeg die gelatien in ‘n baie dun straaltjie by die room en hou aan klits totdat die room begin dik word en die klitser se merke bly. Oppas, vir te veel klits…ons maak nie nou botter nie.

Koek konstruksie
Daar is geen voorgeskrewe reël oor hoe die koek op mekaar gestapel kan word nie…jou keuse. Jy kan die een koek op sy kop draai sodat die meringue na onder lê sodat die koek amper soos ‘’n toebroodjie op mekaar lê. Of jy kan die koek gewoon op mekaar stapel. Vir die foto het ek die lae soos ’n broodjie gepak.

Smeer al die room op die eerste laagkoek en plaas vrugte stukkie of neute in die middel. Ja, selfs sjokolade en fugde sal heerlik werk. Plaas die boonste deel op die koek en voila!

Hierdie koek op die foto het: in die room frambose (raspberries) in die room ingevou en gegeur met vanielje.

Hou die koek te alle tye in die yskas.

Bron: Annelien Pienaar, 2017, BKT resepte afdeling, Gevorderde Koekbak klas
Hoeveelheid: 12 porsies.

 

Print Friendly, PDF & Email
2017-04-23T09:05:41+00:00 6 Comments

6 Comments

  1. THEURIA STEYM April 23, 2017 at 6:08 pm - Reply

    Dankie sterretjie

    • Boerekos April 23, 2017 at 7:04 pm - Reply

      Groot plesier en kom spog op FB se Boerekos met ‘n Twist blad.

  2. Daleen April 25, 2017 at 7:25 pm - Reply

    Jy is n ster Annelien. dankie

    • Annelien April 26, 2017 at 1:26 pm - Reply

      Lekker bak en brou

  3. Mariaan July 2, 2017 at 5:35 pm - Reply

    Lekker om koek op ñ heel ander manier te hê. Gn dit verseker probeer!

    • Annelien July 2, 2017 at 6:29 pm - Reply

      Geniet hierdie resep, dit is ‘n treffer. Groete Annelien

Leave A Comment